Միջազգային կայունացնող ուժերին (ISF) Հայաստանի մաս կազմելու հնարավորության դիտարկումը ՀՀ-ի համար կարող է երաշխավորել նոր հնարավորություններ. արաբագետ

Արաբագետ Արմեն Պետրոսյանը մեկնաբանել է ՄԱԿ-ի ԱԽ-ի կողմից Գազայում պատերազմը դադարեցնելու վերաբերյալ Դոնալդ Թրամփի ծրագրին աջակցություն հայտնելու վերաբերյալ որոշմանը:

Ըստ Պետրոսյանի՝ ՄԱԿ-ի ԱԽ-ի կողմից Գազայում պատերազմը դադարեցնելու վերաբերյալ Դոնալդ Թրամփի ծրագրին աջակցությունը (միայն Ռուսաստանն ու Չինաստանն են ձեռնպահ քվեարկել) բավականաչափ կարևոր զարգացում է աշխարհում առկա միջազգային համակարգի ճգնաժամի պայմաններում։ Մեծ հաշվով, ուկրաինական պատերազմի մեկնարկից ի վեր սա եզակի օրինակ է, երբ միջազգային անվտանգության և խաղաղության համար պատասխանատու թիվ մեկ կառույցը՝ ՄԱԿ ԱԽ-ն, փոխզիջումային լուծման է հանգում՝ նման կերպ նաև կենսունակության դրական միտում դրսևորելով։

Անշուշտ, այս գործընթացում առանցքային կարևորություն ունի հենց Դոնալդ Թրամփի գործոնը։ Նա կարողացել է ոչ միայն հասնել Գազայում 2 տարի տևած արյունալի հակամարտության դադարեցմանը, այլև հիմնական աշխարհաքաղաքական մրցակիցների հետ կայուն և շարունակական երկխոսության ապահովման արդյունքում առնվազն չեզոքացնել ԱԽ-ում ամերիկյան բանաձևի տապալման հնարավորությունը։

Նման պայմաններում՝ միջազգային հանրության աջակցության զորու, հաջորդ քայլն արդեն Դոնալդ Թրամփի ծրագրի՝ գետնի վրա իրականացման շրջափուլն է, որը բավականաչափ բարդ է լինելու։ Ըստ էության, պաղեստինյան ՀԱՄԱՍ խմբավորումն արդենիսկ ծրագրին հակադրվելու մանևրներ է իրականացնում, չնայած, որ այս հարցում խմբավորումը փաստացի միայնակ է մնացել։

Վերոնշյալի համատեքստում նպատակահարմար եմ համարում կրկին անգամ շրջանառել Գազայում Դոնալդ Թրամփի խաղաղության ծրագրի իրականացման նպատակով ձևավորվելիք Միջազգային կայունացնող ուժերին (ISF) Հայաստանի մաս կազմելու հնարավորության դիտարկումը (գրառման հղումը՝ մեկնաբանությունների հատվածում)։ Այն գուցե առաջին հայացքից վիճելի, անգամ վտանգավոր է թվում, բայց, վստահաբար, նաև ոչ ստանդարտ քայլ կարող է լինել՝ երաշխավորելով նոր հնարավորություններ Հայաստանի համար մի շարք կարևոր ուղղություններում։