Միավորված ազգերի կազմակերպության երկու հիմնական մարմինների ղեկավարները` ՄԱԿ-ի Գլխավոր ասամբլեայի նախագահը և Անվտանգության խորհրդի նախագահը, նոյեմբերի 25-ին պաշտոնապես նամակներ են ուղարկել անդամ պետություններին՝ ազդարարել են գլխավոր քարտուղարի պաշտոնի ընտրության գործընթացի մեկնարկը:
Նամակի հեղինակներն անդամ պետություններին առաջարկել են առաջադրել իրենց թեկնածուներին գլխավոր քարտուղարի պաշտոնի համար։ Նրանք նշում են, որ այս կարևոր պաշտոնը զբաղեցնող անձը պետք է համապատասխանի արդյունավետության և կոմպետենտության բարձրագույն չափանիշներին, ինչպես նաև ցուցաբերի հավատարմություն ՄԱԿ-ի կանոնադրության սկզբունքներին։
Թեկնածուն պետք է ունենա առաջնորդական որակներ և մասնագիտական հմտություններ դիվանագիտության ու հաղորդակցության ոլորտում, տիրապետի մի քանի լեզուների և ունենա միջազգային հարաբերությունների ոլորտում մեծ փորձ։
Նամակի հեղինակները նաև ցավով նշում են, որ ՄԱԿ-ի գլխավոր քարտուղարի պաշտոնը երբեք կին չի զբաղեցրել և կոչ են անում անդամ պետություններին լրջորեն քննարկել կնոջ թեկնածություն առաջադրելու հարցը։
«Մենք նաև ընդգծում ենք տարածաշրջանային չափման կարևորությունը գլխավոր քարտուղարի ընտրության հարցում»,-նշվում է նամակում։
Թեկնածուն կարող է առաջադրվել մեկ երկրի կամ երկրների խմբի կողմից, բայց յուրաքանչյուր պետություն իրավունք ունի առաջադրել մեկ անձի։
Հիշեցնենք, որ ՄԱԿ-ի ներկայիս գլխավոր քարտուղարի՝ Անտոնիո Գուտերեշի լիազորությունների ժամկետը լրանում է 2026 թվականի վերջին:
Հետևեք մեզ տելեգրամում
