Իրանի արտգործնախարար Աբբաս Արաղչին Ադրբեջանի պաշտոնակցի հետ մամուլի ասուլիսի ընթացքում անդրադարձել է Հայաստանի և Ադրբեջանի հարաբերությունների կարգավորմանը՝ նշելով, որ Իրանն աջակցում է «3+3» ձևաչափով հանդիպմանը:
«Ուրախ ենք, որ Ադրբեջանի ու Հայաստանի հարաբերությունները լավ ընթացք ունեն: Ողջունում և աջակցում ենք երկու երկրների միջև խաղաղության գործընթացին: «3+3»-ի հաջորդ հանդիպումը Բաքվում, իսկ այնուհետև Երևանում անցկացնելու Ադրբեջանի առաջարկը լավ առաջարկ է, մենք աջակցում ենք այդ առաջարկին և կարծում, որ լավ նախաձեռնություն է, որը կարող է «3+3» մեխանիզմն ավելի ազդեցիկ և ուժեղ դարձնել»,,-ասել է Արաղչին՝ միաժամանակ շեշտելով ցանկացած արտաքին միջամտության անթույլատրելիությունը:
«Կարևորն այն է, որ տարածաշրջանի անվտանգությունը պետք է ապահովեն հենց տարածաշրջանի երկրները, իսկ արտաքին ցանկացած միջամտություն կքանդի այդ անվտանգությունը: Սա մի կետ է, որի շուրջ մենք ունենք համաձայնություն և որի հիման վրա էլ շարունակում ենք համագործակցությունը»,-նշել է Իրանի ԱԳ նախարարը:
Հետևեք մեզ տելեգրամում
