Թբիլիսիում անցկացվել է Հայաստանի և Վրաստանի խորհրդարանների արտաքին հարաբերությունների հանձնաժողովների տարեկան համատեղ նիստը։ Կողմերը քննարկել են Վրաստանի և Հայաստանի միջև առկա հարաբերությունները, ռազմավարական գործընկերության կարևորությունը և տնտեսական համագործակցության ամրապնդման հնարավորությունները։
Հայկական պատվիրակությունը խոսել է Ադրբեջանի և Հայաստանի միջև խաղաղության գործընթացի, ինչպես նաև Հայաստան-ԵՄ հարաբերությունների վերջին զարգացումների մասին։
«Մենք անցկացրեցինք Հայաստանի և Վրաստանի խորհրդարանների արտաքին հարաբերությունների հանձնաժողովների երրորդ տարեկան համատեղ նիստը։ Մենք միմյանց հետ կիսվում ենք երկրների ներքին և արտաքին քաղաքականության վերջին զարգացումներով։ Մեր հայ գործընկերներին տեղեկատվություն տրամադրեցինք ՏԻՄ ընտրություններից հետո Վրաստանում ստեղծված քաղաքական իրավիճակի վերաբերյալ։ Խոսեցինք Վրաստանի տնտեսական առաջընթացի և այդ առաջընթացին հանգեցրած գործոնների մասին։ Կարևոր է, որ Վրաստանն ու Հայաստանը միասնական դիրքորոշում ներկայացնեն միջազգային հարցերում, քանի որ դա կնպաստի Հարավային Կովկասի տարածաշրջանի կայուն զարգացմանը»,- ասել է Վրաստանի արտաքին հարաբերությունների հանձնաժողովի նախագահ Նիկոլոզ Սամխարաձեն։
Հետևեք մեզ տելեգրամում
