Թուրքական զինված ուժերի շարասյուները Սիրիա են մտել երեք ուղղություններից՝ Աֆրինից, Ռասուլեյնից և հյուսիսային Հալեպի տարածքից: Ըստ թուրքական լրատվամիջոցների՝ Թուրքիայի բանակի ավտոշարասյուները շարժվում են Մանբիչի ուղղությամբ:
Ըստ թուրքական ԶԼՄ-ների՝ Թուրքիայի զինված ուժերի ռազմական շարասյուններից մեկը Հալեպի շրջան է մտել Դեյր Բալլութի սահմանային անցակետով, իսկ մեկ այլ շարասյուն՝ գիշերվա ուշ ժամերին մտել է Ադվանիայի սահմանային անցակետով։
Սիրիական կառավարական զորքերը նույնպես սկսել են նոր ռազմական համալրումներ ուղարկել Դեյր-էլ-Զորի շրջան։
Ավելի վաղ հայտնի էր դարձել, որ Թուրքիայի զինված ուժերի գլխավոր շտաբի գեներալ-լեյտենանտ Սելջուկ Բայրաքթարօղլուն պաշտոնական հրավերով 2025 թվականի դեկտեմբերի 5-6-ը այցելել է Սիրիայի մայրաքաղաք Դամասկոս: Այս շփումներից անմիջապես հետո տեղեկատվություն է ստացվել, որ Թուրքիայի զինված ուժերը նոր ուժեր են ուղարկել Սիրիա: Ըստ թուրքական որոշ լրատվամիջոցների՝ այս իրադարձությունները դիտարկվում են որպես
Թուրքիայի զինված ուժերի ու Սիրիայի կառավարության համատեղ ռազմական գործողությունների նախապատրաստական աշխատանքներ Սիրիայի քրդական ուժերի դեմ, որոնց Անկարան համարում է ահաբեկչական։
Հիշեցնենք, որ Թուրքիայի զինված ուժերի վերջին տարիներին, այդ թվում Սիրիայի նախորդ կառավարության ժամանակաշրջանում, մի շարք ռազմական գործողություններ են իրականացրել Սիրիայի քրդական ուժերի դեմ, որոնց հետևանքով մի շարք շրջաններ հայտնվել էին Թուրքիայի զինուժի ու այդ ժամանակ դեռևս Սիրիայի ընդդիմադիր խմբավորումների վերահսկողության տակ։
Սիրիայյում տեղի ունեցած իշխանափոխությունից հետո, մինչ այս իրադարձությունները, Թուրքիայի զինված ուժերը քրդական խմբավորումներին կոչ էին արել դուրս գալ այն շրջաններից, որտեղ նրանք դեռևս ներկայություն ունեն, հակառակ դեպքում Անկարան Սիրիայի կառավարության հետ համտեղ կարող է ռազմական գործողություններ սկսել։
Հետևեք մեզ տելեգրամում
