Թուրքիայի արտաքին գործերի նախարար Հաքան Ֆիդանը հայտարարել է, որ Ստամբուլը մնում է միակ հարթակը, որտեղ Ռուսաստանը և Ուկրաինան կարողացել են քննարկել կարգավորման հարցը, և Անկարան պատրաստ է վերակենդանացնել այս բանակցային գործընթացը։
«Ռուս-ուկրաինական պատերազմը մեր տարածաշրջանի առջև ծառացած ամենադժվար մարտահրավերներից մեկն է։ Առաջին օրվանից մեր սկզբունքը հստակ է եղել. պատերազմում հաղթողներ չկան, իսկ արդար խաղաղության մեջ՝ պարտվողներ։ Այս համոզմունքով առաջնորդվելով՝ մենք այն երկիրն ենք եղել, որն ամենաինտենսիվ ջանքերն է գործադրել պատերազմը դիվանագիտական ճանապարհով ավարտելու համար։ Ստամբուլը մնում է միակ հարթակը, որտեղ կողմերը կարողացել են հանդիպել տեխնիկական մակարդակով և քննարկել խաղաղ կարգավորման պարամետրերը», – ասել է նախարարը Անկարայում անցկացվող ամենամյա դեսպանների համաժողովի բացման ժամանակ։
Նա հավելել է, որ Թուրքիայում բանակցություններ անցկացնելը «թուրքական դիվանագիտության նկատմամբ վստահության դրսևորում է»։
«Թուրքիան պատրաստ է իրականացնել ցանկացած նախաձեռնություն, աջակցելու դեր խաղալ և վերականգնել խաղաղ բանակցությունների հարթակը՝ պատերազմը դիվանագիտական ճանապարհով լուծելու համար», – հավելել է նա։
Հետևեք մեզ տելեգրամում
