Իսրայելի իշխանությունները վերջնական որոշում են կայացրել բժշկական կանեփի արտահանման վերաբերյալ: Նրանք որոշել են թույլ տալ, որ այն վաճառվի այլ երկրներում: Այդ արդյունաբերությունից հարյուր միլիոնավոր դոլարների եկամուտ է ակնկալվում: Այս մասին հրամագիր է ստորագրել Իսրայելի Էկոնոմիկայի նախարարի Էլի Կոենը։
Նշենք, որ այս որոշումը Իսրայելի նախարարների կաբինետը հաստատել էր դեռևս 2019թ․ հունվարին։ Սակայն դրանից հետո այս հարցը քննարկվել է երկրի առողջապահության և ֆինանսների նախարարության հատուկ հանձնաժողովում։
Պաշտոնյաները մշակել են անհրաժեշտ բոլոր փաստաթղթերը: Այլ երկրներին վաճառելու համար կանեփ արտահանողներին անհրաժեշտ կլինի ստանալ Իսրայելի առողջապահության նախարարության հատուկ թույլտվությունը:
Իսրայելում կա 8 ընկերություն, որոնք զբաղված են կանեփի մշակությամբ, ևս մի քանիսն էլ՝ մարիխուանայի արտադրությամբ և վաճառքով: Նրանց մի մասը արդեն հայտնել են, որ ցանկանում են արտասահմանյան գնորդների հետ առևտուր անել:
Հիշեցնենք, որ Իսրայելը Մերձավոր Արևելքում առաջին պետությունն է, որտեղ ապաքրեականացրել են մարիխուանայի օգտագործումը։
Հետևեք մեզ տելեգրամում
