«Հուսով ենք, որ մենք կտեսնենք Զանգեզուրի միջանցքի իրականացումը այնպես, ինչպես ցանկանում է Ադրբեջանը». Ֆիդան

Թուրքիայի արտգործանախարար Հ. Ֆիդանը միջազգային և տեղական մամուլի ներկայացուցիչների հետ հանդիպման ժամանակ անդրադառնալով տարածաշրջանային խնդիրներին, անդրադարձել է նաև Կովկասի ու TRIPP-ի հարցերին:

«Ակնհայտ է, որ Թուրքիայի նախագահի առաջնորդությամբ մեր արտաքին քաղաքականությունը 2025-ին պրակտիկ և ազդեցիկ արդյունքեր է գրանցել: Կովկասում մնայուն խաղաղության հաստատումը և Բալկանյան երկրների ու թյուրքական պետությունների հետ ունեցած մեր հարաբերությունների ավելի ամրապնդումը 2025-ին մեր օրակարգում ավելի լայն տեղ է զբաղեցրել»,-նշել է Ֆիդանը:

Անդրադառնալով TRIPP-ին ֆիդանը կիրառել է «Զանգեզուրի միջանցք » տերմինը։

«Հուսով ենք, որ մենք կտեսնենք Զանգեզուրի միջանցքի իրականացումը այնպես, ինչպես ցանկանում է Ադրբեջանը, քանի որ այն կարևոր է Միջին միջանցքի համար: Մեծ ռազմավարական պատկերի և ավելի տեղային մակարդակում՝ դա կարևոր է նաև Նախիջևանի՝ Ադրբեջանի մայր տարածքին միավորման տեսակետից։ Իհարկե, այս միջանցքի միջոցով Թուրքիայի՝ թյուրքական աշխարհին և Կենտրոնական Ասիային ուղղակի հասանելություն ունենալն էլ է կարևոր: Այս ուղղությամբ ինտենսիվ աշխատանք է տարվում: Երբ Հայաստանի արտգործնախարարը գտնվում էր Ամերիկայում, հրապարակվեց մի փաստաթուղթ: Նրանք այն անվանում են «TRIPP», նկատի ունենալով այն, ինչ մենք անվանում ենք Զանգեզուրի միջանցք «ինչպե՞ս կարող ենք կյանքի կոչել» հարցադրմամբ: Հիմա կան որոշ տեխնիկական հարցեր, որոնք կապված են դրա հետ: Մենք այն շատ մանրամասն ուսումնասիրել ենք։ Ապա, ես մոտ երկու ժամ խոսեցի իմ հարգարժան գործընկեր Ջեյհուն Բայրամովի հետ՝ քննարկելով, թե ինչ է գրված այս փաստաթղթում, ինչպես են նրանք դիտարկում դա, քանի որ նրանց տեսակետը կարևոր է: Այս թեմայով նաև ներկայացրինք տեղեկատվություն մեր նախագահին»,-նշել է Ֆիդանը։