Վրաստանի խորհրդարանի փոխխոսնակ Գիորգի Վոլսկին «Իմեդի LIVE» հաղորդման ընթացքում, անդրադառնալով տարածաշրջանում տեղի ունեցող զարգացումներին, նշել է, որ Վրաստանին ձեռնտու չէ Իրանի տապալումը, քանի որ կարող է ձևավորվել ապակայունացման այնպիսի շղթա, որը կհասնի մինչև Պարսից ծոց։ Բացի այդ, այստեղ կան հսկայական հարցեր, որոնք կարող են զարգացնել այնպիսի շղթա, որի մեջ կարող է հայտնվել նաև Վրաստանը։
Վոլսկիի խոսքով՝ երբ դու չունես այդ իրադարձությունների վրա որոշակի ազդեցություն ունենալու ուժ, բնականաբար, պետք է աշխատես այլ ուղղություններով։
«Վերջերս խոսվում է այն մասին, որ Ադրբեջանը սկսել է կատարել Եվրոպային էներգառեսուրսներ մատակարարելու վերաբերյալ պայմանավորվածությունները, Վրաստանի ենթակառուցվածքները պատրաստ են, և եթե ծավալները ավելանան, դա լավ կլինի նաև Վրաստանի համար։ Մենք պետք է աջակցենք Հայաստանի տարածքով Ադրբեջանի և Թուրքիայի միջև այդ միջանցքի զարգացմանը, սակայն դրա շուրջ աղմուկ բարձրացնելը, առաջ նետվելը, կուրծք ծեծելով հայտարարելը, թե «մենք ենք այստեղ և մենք ենք որոշում», սխալ է»,- ընդգծել է Վոլսկին։
Հետևեք մեզ տելեգրամում
