Թուրքիայի նախագահ Ռեջեփ Թայիփ Էրդողանն իր ամերիկացի գործընկեր Դոնալդ Թրամփին Իրանի հարցով եռակողմ գագաթնաժողով է առաջարկել։ Այս մասին գրում է կառավարամետ «Հյուրիեթ» թերթը։
Ըստ թերթի՝ Էրդողանը առաջարկի մասին հայտարարել է հունվարի 27-ին՝ ԱՄՆ նախագահի հետ հեռախոսազրույցի ժամանակ։ Թուրք առաջնորդը կոչ է արել ԱՄՆ-ի, Իրանի և Թուրքիայի միջև գագաթնաժողով անցկացնել, հնարավոր է՝ տեսակոնֆերանսի միջոցով։
«Ըստ տեղեկությունների՝ Թրամփը դրական է վերաբերվում Էրդողանի առաջարկին», – գրում է թերթի սյունակագիր Հանդե Ֆըրաթը։
«Հյուրիեթը» նաև հաղորդում է, որ Իրանի արտաքին գործերի նախարար Աբբաս Արաղչին այս շաբաթ կայցելի Թուրքիա՝ իր գործընկեր Հաքան Ֆիդանի հետ բանակցություններ վարելու համար, չնայած կոնկրետ ամսաթվեր դեռևս չեն հայտարարվել։
Թուրքիայի և Իրանի արտաքին գործերի նախարարները վերջին անգամ հեռախոսազրույց են ունեցել հունվարի 28-ին՝ քննարկելով Իրանի շուրջ վերջին զարգացումները և տարածաշրջանում լարվածության թուլացման ջանքերը։ Անկարայում հույս ունեն, որ Իրանի շուրջ ստեղծված իրավիճակը կկարգավորվի դիվանագիտական ճանապարհով։
Հետևեք մեզ տելեգրամում
