Վրաստանը չի փոխել իր քաղաքականությունը և չի պլանավորում պատժամիջոցներ կիրառել Ռուսաստանի դեմ կամ զորքեր ուղարկել Ուկրաինա։ Այս մասին հայտարարել է երկրի խորհրդարանի խոսնակ Շալվա Պապուաշվիլին՝ մեկնաբանելով գրեթե չորս տարի անց Թբիլիսիում Ուկրաինայի դեսպանի նշանակումը։
«Ինչպես գիտեք, Ուկրաինայի նախագահը դեսպան նշանակեց Վրաստանում, ինչը, մի կողմից, մենք ողջունում ենք, բայց մյուս կողմից, առաջանում է մեկ հարց. ի՞նչ է փոխվել։ Վրաստանը չի փոխել իր քաղաքականությունը։ Մենք չորս տարի առաջ ասել ենք, որ երկկողմ պատժամիջոցներ չենք կիրառի, և շարունակում ենք դա ասել նաև հիմա։ Ինչպես ասացինք, մենք զորքեր չենք ուղարկի այնտեղ կռվելու, պետությունը հիմա նույնպես զորքեր ուղարկելու ծրագրեր չունի», – լրագրողներին ասել է Պապուաշվիլին՝ պարզաբանելով, որ Ռուսաստանի դեմ պատժամիջոցների և Ուկրաինա զորքեր ուղարկելու հարցերը պատճառ են հանդիսացել Ուկրաինայի դեսպանի՝ 2022 թվականին Թբիլիսիից հետ կանչելու։
«Հուսով եմ, որ այս նշանակումը ցույց է տալիս, որ Ուկրաինայի իշխանությունները վերանայել են վրացիների նկատմամբ լսած, ցավոք, թշնամական հռետորաբանությունը, այդ հակավրացական որոշումները, այդ թվում՝ վրացական պետության դեմ, և հասկացել են, որ դա արդյունքներ չի տալիս, ուստի դեսպանի նշանակումը կարևոր է», – նշել է խորհրդարանի խոսնակը։
Հունվարի 26-ին Վլադիմիր Զելենսկին Միխայիլ Բրոդովիչին նշանակել է Վրաստանում Ուկրաինայի դեսպան։
Հետևեք մեզ տելեգրամում
