Հայաստանը համագործակցում է Առողջապահության համաշխարհային կազմակերպության հետ՝ նպատակ ունենալով Գազայից տասնյակ երեխաների բուժումը կազմակերպել իր բժշկական կենտրոններում։ Այդ մասին ՄԱԿ-ում ՀՀ մշտական ներկայացուցչի տեղակալ Ժիրայր Անանյանը ՄԱԿ Անվտանգության խորհրդի «Իրավիճակը Միջին Արևելքում» խորագրով բաց քննարկման ժամանակ:
Անդրադառնալով Միջին Արևելքին Հայաստանի աշխարհագրական մերձակայությանը, տարածաշրջանի երկրների հետ պատմականորեն բարեկամական հարաբերություններին, ինչպես նաև հայկական համայնքների նշանակալի ներկայությանը՝ ՄԱԿ-ում ՀՀ ՄՆ տեղակալն առանձնանշել է հայ խաղաղապահների մասնակցությունը Լիբանանում ժամանակավոր տեղակայված խաղաղապահ առաքելությունում (UNIFIL)։
Նա առանձնացրել է նաև Հայաստանի աջակցությունը ՄԱԿ ԱԽ 2803 բանաձևին, որը վերաբերում է Գազայի իրավիճակին և ընդունվել է 2025 թվականի նոյեմբերի 17-ին։ Ըստ նրա՝ Հայաստանը՝ որպես Խաղաղության խորհրդի հիմնադիր անդամ, իր ստորագրությամբ վերահաստատել է իր հանձնառությունը հետհակամարտային կայունացման, վերակառուցման ու խաղաղության ամրապնդման հարցերում՝ շեշտադրելով Խաղաղության խորհրդի շրջանակում ՀՀ ակտիվ ներգրավվածության պատրաստակամությունը։
Անանյանը ընդգծել է, որ Հայաստանը հետևողական աջակցություն է ցուցաբերում բարեկամ Սիրիայի միասնականությանը, ինքնիշխանությանը և տարածքային ամբողջականությանը՝ հավելելով, որ Սիրիայի՝ սեփական առաջնորդությամբ իրականացվող հետհակամարտային վերականգնման և խաղաղաշինության գործընթացը մեծապես նպաստելու է երկրի կայուն խաղաղությանը։
Հետևեք մեզ տելեգրամում
