Ներկայիս Թուրքիայի արևմտյան Քայսերի (Կեսարիա) նահանգի Քոջասինան շրջանի Ֆիզուլի պողոտայում իրանցին 6 հարկանի շենքի 5-րդ հարկի պատշգամբից սրբիչ է կախել, որի վրա պատկերված է Մեծ Բրիտանիայի դրոշը։ Դեպքը համընկել է Թուրքիայում մայիսի 19-ին նշվող երիտասարդության ու սպորտի տոնի և Աթաթյուրքի հիշատակման օրվա հետ (1919թ․ այդ օրը Մուսթաֆա Քեմալը ժամանել է Սամսուն, ինչը համարվում է քեմալական շարժման մեկնարկ)։
Նշենք, որ այդ օրը ամեն տարի Թուրքիայի ողջ տարածքում թուրքական դրոշներ են փողփողում, իսկ սրբիչի վրա բրիտանական դրոշը աչք է ծակել և հիստերիա է առաջացրել Կեսարիայի ազգայնամոլական շրջանակների մոտ։ Դեպքին անդրադարձել է նաև թուրքական մամուլը։
Դեպքի առնչությամբ քաղաքացիները ահազանգել են ոստիկանություն, որը բերման է ենթարկել Իրանի քաղաքացի Մոհամմադ Ռեզային։ Ոստիկանները առգրավել են նշյալ սրբիչը։
Իրանցին խոստովանական ցուցմունքի ժամանակ ասել է, որ ինքն իր թաց սրբիչը պատշգամբից կախել է, որպեսզի չորանա այն և հավելել, որ սադրանքի մտադրություն չի ունեցել։
Քայսերիի նահանգապետարանի տարածած հաղորդագրության մեջ նշվում է, որ հետաքննություն է սկսվել։
Հետևեք մեզ տելեգրամում
