«Հայաստանի հետ միջուկային համաձայնագրով ԱՄՆ-ը նպատակ ունի սահմանափակել Ռուսաստանի ազդեցությունը Հվ. Կովկասում». թուրքական կայք

Թուրքական «Medyascope.TV» կայքում հրապարակվել է «Ի՞նչ է նշանակում ԱՄՆ-Հայաստան միջուկային համաձայնագիրը» վերնագրով հոդված, որում նշվում է, որ ԱՄՆ-ն և Հայաստանը ստորագրել են քաղաքացիական միջուկային էներգետիկայի ոլորտում համագործակցության համաձայնագիր, որով Վաշինգտոնը նպատակ ունի սահմանափակել Ռուսաստանի ազդեցությունը Հարավային Կովկասում։

«ՀՀ վարչապետ Նիկոլ Փաշինյանի և ԱՄՆ փոխնախագահ Ջեյ Դի Վենսի կողմից ստորագրված համաձայնագիրը դիտվում է որպես Հարավային Կովկասում Երևանի հետ հարաբերությունները խորացնելու և Ռուսաստանից էներգետիկ կախվածությունը նվազեցնելու Վաշինգտոնի ռազմավարության մի մաս։
Էներգամատակարարման ոլորտում երկար ժամանակ Ռուսաստանից և Իրանից կախված Հայաստանը ծրագրում է կառուցել նոր ատոմակայան՝ խորհրդային շրջանում կառուցված և արդեն իր տնտեսական շահագործման ժամկետին մոտեցող Մեծամորի ատոմակայանի փոխարեն։ Թեև դիտարկվում են ԱՄՆ-ի, Ռուսաստանի, Չինաստանի, Ֆրանսիայի և Հարավային Կորեայի առաջարկները, ստորագրված համաձայնագիրը գնահատվում է որպես ամերիկյան նախագծերի ճանապարհը բացող կարևոր քայլ»,-ասվում է հոդվածում։

Հոդվածում անդրադարձ է կատարվում Մոսկվայի արձագանքին՝ ընդգծելով, որ Մոսկվան Հարավային Կովկասը դիտարկում է որպես իր ավանդական ազդեցության գոտի, և ԱՄՆ-ի այս քայլը Ռուսաստանի համար նշանակում է լուրջ ազդեցության կորուստ։

Վերջում նշվում է, որ ԱՄՆ փոխնախագահ Ջեյ Դի Վենսի այցը Հայաստան պատմական է, քանի որ այն առաջին պաշտոնական այցն է գործող ԱՄՆ փոխնախագահի կողմից։