ԱՄՆ Ներկայացուցիչների պալատի նախկին խոսնակ Նենսի Փելոսին քննադատել է ԱՄՆ փոխնախագահ Ջեյմս Դեյվիդ Վենսին՝ Ծիծեռնակաբերդ այցի վերաբերյալ հրապարակումը ջնջելու համար։
Փելոսին X-ի իր էջում հիշեցրել է, որ 2022 թվականին Հայաստանի այցելության ընթացքում ինքը և Կոնգրեսի պատվիրակությունը հստակ և առանց վերապահումների խոսել են Հայոց ցեղասպանության մասին՝ ընդգծելով, որ ճշմարտությունը կարևոր է։ Նա նշել է, որ այդ ճշմարտությունը վերահաստատվել է 2019 թվականին Ներկայացուցիչների պալատի կողմից ընդունված երկկուսակցական բանաձևով, ինչպես նաև 2021 թվականին նախագահ Ջո Բայդենի պաշտոնական ճանաչմամբ։
Գրառման վերջում Փելոսին գրել է․ «Խորապես հիասթափեցնող է, թեև ոչ զարմանալի, տեսնել, որ փոխնախագահը ջնջում է այդ ճշմարտությունն ընդունող գրառումը։ Պատմության ջնջումը վիրավորում է զոհերի հիշատակը և թուլացնում մարդու իրավունքների պաշտպանության մեր հանձնառությունը ամբողջ աշխարհում»։
Նշենք, որ փոխնախագահ Վենսը ջնջել է Հայոց ցեղասպանության հուշահամալիր կատարած այցի մասին X-ում արած իր գրառումն ու լուսանկարները։ «Ազատությունը» բացառիկ մեկնաբանություն է ստացել փոխնախագահի աշխատակազմից, որտեղ հայտնել են, թե գրառումը սխալմամբ է տեղադրվել այն աշխատակիցների կողմից, որոնք չեն եղել փոխնախագահի գլխավորած պատվիրակության կազմում։ Վենսի խոսնակը նշել է, որ օգտահաշիվը կառավարվում է աշխատակիցների կողմից, որոնք հիմնականում տարածում են փոխնախագահի լուսանկարներն ու տեսանյութերը, և առաջարկել է փոխնախագահի տեսակետին ծանոթանալ նրա՝ ինքնաթիռի մոտ արած մեկնաբանությունում։
Հետևեք մեզ տելեգրամում
