Օմանում ընթացող «Camel Beauty Show Festival 2026» փառատոնի ժամանակ 20 ուղտեր որակազրկվել են գեղեցկության մրցույթից այն բանից հետո, երբ անասնաբուժական տեսուչները պարզել են, որ նրանք ենթարկվել են կոսմետիկ միջամտությունների, հայտնում է Forbes-ը:
Հիալուրոնաթթվի ներարկումներն օգտագործվել էին ուղտերի շուրթերին ծավալ հաղորդելու համար: Դերմալ ֆիլլերներ և սիլիկոն՝ քթի ավելի վեհաշուք պրոֆիլ ստանալու համար: Բոտոքս՝ դեմքի արտահայտությունը մեղմելու: Սիլիկոնե մոմ՝ սապատը ճիշտ չափով ուռեցնելու համար:
Սա, սակայն, առաջին դեպքը չէ, երբ ուղտերի թագավորությունը հայտնվում է նման սկանդալի կենտրոնում: 2018 թվականին Սաուդյան Արաբիայի Թագավոր Աբդուլազիզի անվան ուղտերի փառատոնը որակազրկեց տասներկու հավակնորդների, որոնց շուրթերին կասկածելիորեն ներարկվել էին ֆիլլերներ և բոտուլոտոքս: Իսկ 2021-ին ավելի քան քառասուն ուղտ հեռացվեց սաուդյան նույն շոուից:
Մրցանակային ֆոնդերը սովորաբար հասնում են 66 միլիոն դոլարի: Երբ խաղադրույքներն այդքան բարձր են, նույնիսկ ուղտի բնական տվյալները կարող են հանկարծ անբավարար թվալ:
Կոսմետիկ նյութերի օգտագործումը, ինչպիսիք են բոտոքսը, հիալուրոնաթթուն, ֆիլլերները, սիլիկոնը և հորմոնները, զգալի վտանգ են ներկայացնում կենդանիների առողջության և բարեկեցության համար, այդ թվում՝ ցավ ներարկման վայրերում, վարակներ, այտուցներ, կապտուկներ, հյուսվածքների մեռուկացում և թարախակույտերի առաջացում, ինչը հաճախ սրվում է, երբ միջամտությունները կատարվում են ոչ որակավորված անձանց կողմից՝ առանց պատշաճ ստերիլիզացման կամ վերահսկողության:
Հետևեք մեզ տելեգրամում
