Վրաստանի կառավարությունը հայտարարություն է տարածել ԱՄՆ-ի ու Իսրայելի կողմից Իրանի վրա հարձկման վերաբերյալ։ Հայտարարության մեջ մասնավորապես նշվում է.
«Վրաստանի կառավարությունը խոր մտահոգությամբ է հետևում Մերձավոր Արևելքում ընթացող ռազմական գործողություններին, որոնք սպառնում են տարածաշրջանի բոլոր երկրների անվտանգությանն ու բարօրությանը։ Մեր ցավակցությունն ենք հայտնում իրանցի ժողովրդին և Իրանի Իսլամական Հանրապետությանը, որտեղ ընթացող ռազմական գործողությունները խլել են բազմաթիվ մարդկանց կյանքեր, այդ թվում՝ գերագույն առաջնորդի, քաղաքական այլ առաջնորդների, բազմաթիվ անմեղ քաղաքացիների և տասնյակ երեխաների։
Ցավակցում ենք մեր բարեկամ հրեա ժողովրդին և Իսրայելին՝ ռազմական գործողությունների հետևանքով խաղաղ բնակիչների զոհվելու կապակցությամբ։
Վրաստանի կառավարությունը լիակատար սոլիդարություն է հայտնում Ծոցի արաբական երկրներին, որոնց հետ Վրաստանին կապում է առանձնահատուկ գործընկերություն։ Հույս ենք հայտնում, որ Մերձավոր Արևելքում մոտ ապագայում կվերականգնվի խաղաղությունը, ինչի համար ռազմական գործողությունները պետք է փոխարինվեն դիվանագիտությամբ և քաղաքական երկխոսությամբ։ Վրաստանի կառավարությունը կձեռնարկի բոլոր անհրաժեշտ միջոցները տարածաշրջանում գտնվող մեր քաղաքացիների անվտանգությունն ապահովելու և նրանց շահերը պաշտպանելու համար»։
Հետևեք մեզ տելեգրամում
