Թուրքիայի պաշտպանության նախարարությունը հայտարարություն է տարածել՝ տեղեկացնելով, որ ՆԱՏՕ-ն երկրի հարավում տեղակայել է «Patriot» հակահրթիռային պաշտպանության համակարգ։
Հայտարարության մեջ նշվում է, որ տարածաշրջանում տեղի ունեցող վերջին զարգացումների ֆոնին ձեռնարկվում են անհրաժեշտ միջոցներ Թուրքիայի սահմանների և օդային տարածքի պաշտպանության համար, ինչպես նաև շարունակվում են խորհրդակցությունները ՆԱՏՕ-ի և դաշնակից երկրների հետ։
Պաշտպանության նախարարությունը հայտնել է, որ ազգային մակարդակով իրականացվող միջոցառումներին զուգահեռ ՆԱՏՕ-ն ուժեղացրել է օդային և հակահրթիռային պաշտպանության հնարավորությունները։ Այդ շրջանակում Թուրքիայի օդային տարածքի պաշտպանությանը աջակցելու նպատակով «Patriot» համակարգերից մեկը տեղակայվել է Մալաթիա քաղաքում։
Հայտարարության համաձայն՝ Թուրքիան շարունակելու է ՆԱՏՕ-ի և դաշնակիցների հետ համագործակցության շրջանակում գնահատել տարածաշրջանային զարգացումները և ջանքեր գործադրել խաղաղության ու կայունության ապահովման ուղղությամբ։
Նշենք, որ նախօրեին Թուրքիայի պաշտպանության նախարարությունը հայտնել էր, որ Իրանից արձակված և Թուրքիայի օդային տարածք մտած ևս մեկ բալիստիկ հրթիռ է վնասազերծվել։
Հետևեք մեզ տելեգրամում
