Կարատեի աշխարհի և Եվրոպայի բազմակի չեմպիոն Կամո Ունանյանը տպավորիչ հաղթանակ է տարել իրանցի մարզիկ Ամիր Բախրամեդջանի նկատմամբ mարտի 28-ին անցկացված Hype Fighting MMA խոշոր մրցաշարում, հայտնում է Հայաստանի կարատեի միության լրատվականը։
«Հենց սկզբից էլ պլանավորել էի հարձակողական մարտ վարել։ Այդ պլանը շատ լավ աշխատեց, քանի որ մրցակիցս պատրաստ չէր նման արագ ընթացքի, և իմ պլանավորած հնարքը լիովին իրականություն դարձավ», -մեկնաբանելով իր հաղթանակը՝ ասել է Կամո Ունանյանը։
Այս հաղթանակը Կամո Ունանյանի համար ուներ երկու առանցքային նշանակություն. նախ՝ տպավորիչ այս արդյունքով նա վերահաստատել է իր տեղը MMA-ի ռինգում՝ պահպանելով անպարտելիի տիտղոսը՝ 8 հաղթանակ և ոչ մի պարտություն։ Բացի այդ, սա մարզիկի առաջին մենամարտն էր ողնաշարի բարդ վիրահատությունից հետո։
Վերջին վեց ամիսների ընթացքում Ունանյանը չէր մարզվել և միայն վերջերս է վերսկսել վերականգնողական մարզումները։ Չնայած մրցակցի վերջին պահին փոփոխությանը և առողջական լուրջ ռիսկերին՝ նա ընդունել է մարտահրավերը և հաջողությամբ իրականացրել այն։
«Անկեղծ լինեմ՝ դեռ լիովին չեմ վերականգնվել։ Բայց ես ժամանակ չունեմ սպասելու լիարժեք ապաքինմանը, քանի որ սպորտային կարիերայում ժամանակն արագ է անցնում։ Գիտակցված ռիսկի գնացի մրցաշարին մասնակցելու համար և արդեն ունեմ հաղթանակ», – խոստովանել է չեմպիոնը։ Կամո Ունանյանի մարզական օրացույցը արդեն հայտնի է։ Այս տարի նա պատրաստվում է MMA-ի ևս մեկ մենամարտի, որը նախատեսվել է մայիսի 30-ին՝ MIX fight մրցաշարի շրջանակում։ Դրանից հետո պարզ է դառնալու տարվա մյուս հանդիպումների ժամանակացույցը։ Բացի այդ, չեմպիոնը պլանավորել է մասնակցել կարատեի տարբեր վարկածներով աշխարհի և Եվրոպայի առաջնություններին»,-ասվում է միության լրատվականի հաղորդագրության մեջ։
Հետևեք մեզ տելեգրամում
