Վրաստանի խորհրդարանի խոսնակ Շալվա Պապուաշվիլին հայտարարել է, որ Վրաստանը հարթակ չէ երրորդ երկրների միջև հարաբերությունների պարզման համար՝ արձագանքելով երկրում Իրանի դեսպան Ալի Մոջանիի հայտարարությանը։ Պապուաշվիլին ընդգծել է, որ թեև Իրանի և ԱՄՆ-ի միջև հարաբերությունները լարված են, Թբիլիսին կոչ է անում բոլոր կողմերին միմյանց հետ հաշիվներ մաքրելու համար չօգտագործել Վրաստանի տարածքը։ Փոխանցում է վրացական Newsgeorgia լրատվակայքը:
Խորհրդարանի խոսնակը վերահաստատել է, որ Վրաստանը շարունակելու է վարել իր «խաղաղության քաղաքականությունը» և թույլ չի տա, որ երկիրը ներքաշվի այլոց հակամարտությունների մեջ, ինչը մշտապես եղել է իշխող թիմի դիրքորոշումը նաև ուկրաինական ճգնաժամի և տարածաշրջանային այլ պատերազմների պարագայում։
Ավելի վաղ Վրաստանում ԻԻՀ դեսպան Ալի Մոջանին վրացերենով նախազգուշական գրառում էր կատարել՝ նշելով, որ «երբ որոշ երկրներ ակամա կամ շտապողականորեն իրենց տարածքը զիջում են արտաքին արկածախնդիրներին, դրա գինը վաղ թե ուշ զգում են հենց երկրի ներսում»։
«Ոչ մի երկիր պաշտպանված չէ տարածաշրջանային ճգնաժամի հետևանքներից: Ճգնաժամը շատ ավելի մոտ է, քան թվում է առաջին հայացքից»,- նշել էր իրանցի դիվանագետը՝ իր գրառմանը կցելով նաև ավտոմեքենայի հայելու պատկեր՝ «Հայելու մեջ օբյեկտները ավելի մոտ են, քան թվում են» մակագրությամբ:
Դեսպանի այս գրառումը հաջորդել է Վրաստանի վարչապետ Իրակլի Կոբախիձեի և ԱՄՆ պետքարտուղար Մարկո Ռուբիոյի հեռախոսազրույցին, որի ընթացքում քննարկվել էին Կովկասի և Սև ծովի տարածաշրջանային անվտանգության հարցերը։ Գրեթե նույն ժամանակահատվածում հայտնի է դարձել Թբիլիսիում ամերիկյան ռազմական ինքնաթիռի վայրէջքի մասին, որը ժամանել էր Գերմանիայի Ռամշտայն ավիաբազայից։
Վրացի փորձագետները դեսպանի գրառումը մեկնաբանել են որպես ակնարկ առ այն, որ տարածաշրջանային ճգնաժամը շատ ավելի մոտ է Վրաստանին, քան թվում է առաջին հայացքից։ Քաղաքագետ Գիա Խուխաշվիլիի կարծիքով՝ սա սպառնալից նախազգուշացում էր Իրանի կողմից, քանի որ Վաշինգտոնը, հնարավոր է, փորձում էր ստուգել Վրաստանի պատրաստակամությունը՝ օգնելու լոգիստիկ խնդիրների լուծման հարցում։
Հետևեք մեզ տելեգրամում
