Ադրբեջանի քաղբանտարկյալների ազատության միությունը հոկտեմբերի 5-ին հրապարակել է երկրում քաղբանտարկյալ համարվող անձանց թարմացված ցուցակը։ Դրանում ընդգրկված է 322 մարդ, որոնցից 15-ը՝ կանայք։
Region Monitor-ի հաղորդմամբ՝ ցուցակը կազմել են «Խաղաղության և ժողովրդավարության ինստիտուտի» տնօրեն Լեյլա Յունուսը և «Քաղաքական բանտարկյալների մոնիթորինգի կենտրոն» հասարակական միավորման ղեկավար Էլշան Հասանովը։ Հեղինակների խոսքով՝ ցուցակը կազմվել է Եվրոպայի խորհրդի խորհրդարանական վեհաժողովի 2012 թվականին ընդունած 1900 բանաձևում ամրագրված «քաղաքական բանտարկյալ» հասկացության չափանիշների հիման վրա։
Մայիսի 13-ին հրապարակված նախորդ ցուցակում ներառված էր 328 անուն։ Իրավապաշտպանների տվյալներով՝ վերջին մոտ չորս ամիսների ընթացքում 28 անձի ազատազրկման ժամկետն ավարտվել է, և նրանք ազատ են արձակվել։ Միևնույն ժամանակ, այդ ժամանակահատվածում ընդդիմության և քաղաքացիական հասարակության ներկայացուցիչների, ազգային փոքրամասնությունների ակտիվիստների և կրոնական գործիչների շրջանում նոր ձերբակալություններ ու դատավճիռներ են արձանագրվել։
Իրավապաշտպանները քաղբանտարկյալներին բաժանել են 12 խմբի։ Ամենամեծ խումբը կազմում են կրոնական գործիչները՝ 178 մարդ, ինչը ցուցակի շուրջ 55 տոկոսն է։
Մյուս խմբերում ընդգրկված են՝
- լրագրողներ և բլոգերներ՝ 31 մարդ,
- իրավապաշտպաններ՝ 7,
- ընդդիմադիր կուսակցությունների և քաղաքացիական հասարակության ներկայացուցիչներ՝ 46,
- ազգային փոքրամասնությունների ակտիվիստներ՝ 6,
- պատերազմի դեմ հանդես եկող ակտիվիստներ՝ 2,
- Սոյուդլուի դեպքի առնչությամբ դատապարտված՝ 1,
- Եվրոպայից արտաքսված քաղաքական ներգաղթյալներ՝ 6,
- Իմիշլիի դեպքի առնչությամբ դատապարտվածներ՝ 12,
- «Թարթառի գործով» դատապարտվածներ՝ 8,
- Գյանջայի դեպքի առնչությամբ դատապարտվածներ՝ 13,
- ցմահ ազատազրկման դատապարտվածներ՝ 12։
Նշենք, որ վերջին տարիներին Իրանի հետ հարաբերությունների լարվածության ֆոնին Ադրբեջանում կրոնական գործիչների ձերբակալությունների ալիք էր սկսվել:
Հետևեք մեզ տելեգրամում
