Կրեմլը Լիտվայում միջուկային զենք տեղադրելու հնարավորությունը համարում է լարվածության սրման քայլ և հայտարարել է, որ այդ դեպքում Ռուսաստանը ստիպված կլինի միջոցներ ձեռնարկել սեփական անվտանգությունն ապահովելու համար։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է «Интерфакс»-ը։
Պեսկովի խոսքով՝ Ռուսաստանի սահմաններին մոտ ՆԱՏՕ-ի ռազմական ենթակառուցվածքի տեղակայումը, ինչպես նաև հարևան երկրում միջուկային զենքի տեղադրումը, չի նպաստի Եվրոպայում կայունությանն ու կանխատեսելիությանը։ Նրա խոսքով՝ նման քայլերը կարող են հանգեցնել լարվածության հետագա աճի։
Պեսկովի հայտարարությունը հաջորդել է Լիտվայի խորհրդարանի՝ Սեյմի, հոկտեմբերի 6-ի քվեարկությանը։ Խորհրդարանը երկրորդ ընթերցմամբ հաստատել է Սահմանադրության փոփոխությունը, որով նախատեսվում է վերացնել Լիտվայի տարածքում զանգվածային ոչնչացման զենքի և օտարերկրյա պետությունների ռազմական բազաների տեղակայման արգելքը։ Փոփոխության վերջնական քվեարկությունը նախատեսված է հունվարի 12-ին։
Լիտվայի պաշտպանության նախարարությունը հայտարարել է, որ փոփոխությունը հնարավորություն կտա երկրին օգտվել ՆԱՏՕ-ի զսպման ամբողջ ներուժից՝ ներառյալ դաշինքի միջուկային ներուժը։ Միաժամանակ ԱՄՆ նախագահի վարչակազմը հայտնել է, որ կքննարկի Լիտվայում մշտական ամերիկյան ռազմակայան տեղակայելու առաջարկը։
Հետևեք մեզ տելեգրամում
