Ապրիլի 12-ին՝ դիվանագետների տարհանումից շուրջ մեկ ամիս անց, Իրանում Ադրբեջանի դեսպանատունը սահմանափակ կազմով վերսկսել է իր գործունեությունը։ Այս մասին հայտնել է «Кавказский Узел»-ը։
Ադրբեջանի ԱԳՆ հայտնել է, որ սկզբնական փուլում դիվանագիտական առաքելությունը կգործի դեսպանի գլխավորությամբ և փոքրաթիվ դիվանագիտական ու վարչական աշխատակիցների մասնակցությամբ։ Լիարժեք աշխատանքի վերականգնումը կիրականացվի փուլային՝ անվտանգության և կազմակերպչական հարցերը հաշվի առնելով։
Հիշեցնենք, որ Ադրբեջանի իշխանությունները որոշել էին տարհանել դիվանագետներին այն բանից հետո, երբ մարտի 5-ին անօդաչու թռչող սարքերի հարվածներ էին հասցվել Նախիջևանի Ինքնավար Հանրապետությանը։ Ադրբեջանի նախագահ Իլհամ Ալիևը այդ հարվածները որակել էր որպես «կանխամտածված ահաբեկչական գործողություն»՝ մեղադրելով Իրանին։ Իրանական կողմը, սակայն, հերքել էր մեղադրանքները՝ հայտարարելով, որ հարվածներ չի իրականացրել Ադրբեջանի տարածքում։
Ավելի վաղ Ադրբեջանը նաև վերացրել էր Իրանի հետ սահմանով բեռնափոխադրումների սահմանափակումները և վերականգնել «Azerbaijan Airlines»-ի կանոնավոր չվերթները, որոնք դադարեցրել էր Նախիջևանի միջադեպից հետո:
Հետևեք մեզ տելեգրամում
