Վրաստանի ԱԳՆ-ն հայտարարել է, որ երկիրը չի կարող ամբողջությամբ համապատասխանել Եվրոպական միության արտաքին քաղաքականությանը, քանի դեռ չի դարձել միության լիիրավ անդամ։ Փոխանցում է «TASS»-ը։
«Հաշվի առնելով անվտանգության հետ կապված խնդիրները՝ մենք պետք է բացառիկ զգուշությամբ մոտենանք ցանկացած գործընթացի և առավել ևս՝ արտաքին քաղաքական կոնկրետ քայլերի ընդունմանը։ Մենք երբեք թույլ չենք տա, որ վիճակագրական ցուցանիշների բարելավման համար վտանգվեն մեր ազգային շահերը։ Այդ պատճառով, մինչև Վրաստանը չդառնա ԵՄ լիիրավ անդամ, դժվար կլինի ամբողջությամբ համապատասխանել նրա արտաքին քաղաքականությանը», – նշել է Վրաստանի ԱԳ նախարար Մակա Բոչորիշվիլին խորհրդարանում իր ելույթի ժամանակ։
Հիշեցնենք, որ 2024 թվականի մայիսին Վրաստանի խորհրդարանը ընդունել էր «Օտարերկրյա ազդեցության թափանցիկության մասին» օրենքը, ինչից հետո երկրի հարաբերությունները ԵՄ-ի և ԱՄՆ-ի հետ զգալիորեն վատթարացել են։ Եվրամիությունը բազմիցս կոչ է արել Վրաստանի իշխանություններին հրաժարվել օրենքից, սակայն իշխող «Վրացական երազանք» կուսակցությունը պնդել է, որ դրա նպատակը երկրում գործող հասարակական կազմակերպությունների ֆինանսական հոսքերի թափանցիկությունն ապահովելն է։
2024 թվականի հոկտեմբերի 26-ին կայացած խորհրդարանական ընտրություններում «Վրացական երազանք»-ը հաղթել էր՝ ստանալով 53,93% ձայն, և խորհրդարանում ապահովել 89 մանդատ 150-ից։ Հետագայում կուսակցությունը հայտարարել էր մինչև 2028 թվականը Եվրամիության հետ անդամակցության բանակցությունների մեկնարկի քննարկումները կասեցնելու և ԵՄ բյուջետային դրամաշնորհներից հրաժարվելու մասին։
Հետևեք մեզ տելեգրամում
