ԱՄՆ նախագահ Դոնալդ Թրամփը հայտարարել է, որ Իսրայելի և Լիբանանի առաջնորդները կարող են բանակցել ապրիլի 16-ին՝ վերջին 34 տարվա ընթացքում առաջին անգամ։ Այս մասին հայտնում է «Al Jazeera»-ն։
«Փորձում ենք փոքր-ինչ թեթևացնել իրավիճակը Իսրայելի և Լիբանանի միջև։ Շատ երկար ժամանակ է անցել նրանց առաջնորդների վերջին շփումից՝ մոտ 34 տարի», – Truth սոցիալական ցանցի իր էջում գրել է Թրամփը։
Միևնույն ժամանակ, Իսրայելի կամ Լիբանանի պաշտոնական շրջանակներից հայտարարության վերաբերյալ արձագանք չի եղել։
Լիբանանցի լրագրողները Թրամփի հայտարարությունը համարել են «վիճահարույց», քանի որ Իսրայելի և Լիբանանի միջև պաշտոնական շփումները մնում են զգայուն թեմա՝ հաշվի առնելով, որ երկրները դեռևս փաստացի պատերազմի մեջ են։
Փորձագետների գնահատմամբ՝ ԱՄՆ-ն փորձում է դիվանագիտական ճնշման միջոցով առանձնացնել լիբանանյան ուղղությունը Իրանի հետ հակամարտությունից և թուլացնել «Հեզբոլլահ»-ի ազդեցությունը երկրում։ Միաժամանակ նշվում է, որ ռազմական ճանապարհով «Հեզբոլլահ»-ի լիարժեք զինաթափումը չափազանց բարդ և ծախսատար է, և առանց Լիբանանի կառավարության մասնակցության այդ գործընթացը դժվար է իրականացնել։
Հիշեցնենք, որ ապրիլի 14-ին 1993 թվականից ի վեր առաջին անգամ Վաշինգտոնում ԱՄՆ միջնորդությամբ Իսրայելի և Լիբանանի միջև տեղի էին ունեցել ուղիղ բանակցություններ երկու երկրների դեսպանների, ԱՄՆ պետքարտուղար Մարկո Ռուբիոյի, ինչպես նաև ԱՄՆ դիվանագետների մասնակցությամբ։ Իսկ «Հեզբոլլահ»-ը կտրականապես մերժել էր բանակցությունները՝ դրանք որակելով որպես «անիմաստ» և «զիջում» Իսրայելին ու ԱՄՆ-ին։
Հետևեք մեզ տելեգրամում
