Վրաստանի կրթության նախարարությունը պաշտոնապես ներկայացրել է դպրոցական նոր համազգեստների էսքիզները, որոնք 2026 թվականի սեպտեմբերից պարտադիր կդառնան հանրակրթական դպրոցների տարրական դասարանների աշակերտների համար: Այս մասին հայտնում է Newsgeorgia լրատվական կայքը:
Իշխանություններն արդեն սկսել են շուկայի ուսումնասիրությունը՝ 1-6-րդ դասարանցիների համար հարյուր հազարավոր բաճկոններ, տաբատներ և շրջազգեստներ ձեռք բերելու նպատակով, ինչը նախատեսված է 2026-2027 ուսումնական տարվա համար: Ըստ «Հանրակրթության մասին» օրենքում կատարված փոփոխությունների՝ պետական դպրոցներում համազգեստ կրելը դառնում է պարտադիր պահանջ, որը, կրթության նախարար Գիվի Միկանաձեի պարզաբանմամբ, «կնպաստի ուսումնական առողջ մթնոլորտի ձևավորմանը, կնվազեցնի երեխաների միջև տեսանելի սոցիալական տարբերությունները և կհիմնի նոր ավանդույթ՝ հետևելով առաջատար երկրների փորձին»:
Նախարարի փոխանցմամբ՝ սոցիալապես անապահով ընտանիքների երեխաներին պետությունը համազգեստները կտրամադրի անվճար: Հատկանշական է, որ ԽՍՀՄ փլուզումից հետո Վրաստանում պետական մակարդակով պարտադիր դպրոցական համազգեստ երբևէ չի ներդրվել:
Հետևեք մեզ տելեգրամում
