Անթալիայում հանդիպել են Վրաստանի վարչապետ Իրակլի Կոբախիձեն և Թուրքիայի նախագահ Ռեջեփ Թայիփ Էրդողանը։ Վրաստանի կառավարության փոխանցմամբ՝ հանդիպման ժամանակ քննարկվել են Վրաստան-Թուրքիա ռազմավարական գործընկերությունը, տարբեր ոլորտներում հաջող համագործակցությունը և տարածաշրջանում տեղի ունեցող իրադարձությունները։
«Հանդիպման ընթացքում քննարկվել են առևտրատնտեսական համագործակցության դրական դինամիկան և համատեղ տարածաշրջանային նախագծերի դերը, այդ թվում՝ Բաքու-Թբիլիսի-Կարս երկաթուղու, ինչպես նաև Բաքու-Թբիլիսի-Ջեյհան նավթամուղի, Բաքու-Թբիլիսի-Էրզրում գազամուղի և Հարավային գազային միջանցքի կարևորությունը՝ ինչպես տարածաշրջանը Եվրոպայի հետ կապելու, այնպես էլ Եվրոպայի էներգետիկ անվտանգության ամրապնդման առումով։ Կողմերը քննարկել են «Միջին միջանցքի» ներուժը և դրա զարգացման գործում հետագա համագործակցությունը», – նշվել է Վրաստանի կառավարության հայտարարության մեջ։
Հետևեք մեզ տելեգրամում
