Հայաստանի վարչապետ Նիկոլ Փաշինյանը հայտարարել է, որ շարունակվում են աշխատանքները Հայաստան-Թուրքիա սահմանի բացումն ու Ադրբեջանի հետ խաղաղության վերջնական համաձայնագրի ստորագրումը հնարավորինս շուտ իրականացնելու ուղղությամբ։ Վարչապետն այս մասին հայտնել է ՀՀ կառավարության նիստից հետո հրավիրված ճեպազրույցի ընթացքում։
«Ես կարծում եմ, որ վաղուց ժամանակն է, որ Հայաստանի, Ադրբեջանի և Թուրքիայի պաշտոնյաների շփումները լինեն աշխատանքային առօրյա գործունեության ընդհանուր ընկալման մեջ»,-նշել է վարչապետն՝ անդրադառնալով վերջին շրջանում վերոնշյալ երկրների պաշտոնատար անձանց միջև տեղի ունեցող շփումների ու հանդիպումների ակտիվացմանը վերաբերող հարցին։
Խոսելով արդեն Հայաստան-Թուրքիա սահմանի բացման ճակատագրի, ինչպես նաև Ադրբեջանի հետ խաղաղության համաձայնագրի վերջնական ստորագրման հեռանկարներին վերաբերող հարցի մասին՝ վարչապետ Փաշինյանը նշեց, որ այդ առումով նորություններ չկան։
«Նոր բան չկա, բայց կա նաև այն, որ ամենօրյա աշխատանք է տեղի ունենում։ Փորձում ենք հնարավորություններ գտնել՝ նաև տարբեր ուղղություններով զարգացնելու հարաբերությունները»,-ասաց վարչապետը։ Այդ համատեքստում նա նաև հիշեցրեց, որ թուրքական ավիաընկերություններից մեկն արդեն սկսել է թռիչքներ իրականացնել դեպի Հայաստան։
«Հույս ունենք, որ թուրքական ավիաընկերություններից որևէ մեկի կողմից թռիչքներ կիրականացվեն նաև Գյումրիի ուղղությամբ»,- նշել է Փաշինյանը։
Վարչապետը շեշտել է, որ իր համար հարցն այն չէ, թե տեղի կունենան արդյո՞ք Հայաստան-Թուրքիա սահմանի բացումը կամ Հայաստան-Ադրբեջան խաղաղության համաձայնագրի ստորագրումը, հարցն այն է, թե դա ե՞րբ տեղի կունենա։ Ըստ նրա՝ այժմ աշխատանքներ են իրականացվում, որ դրանք հնարավորինս շուտ տեղի ունենան։
Հետևեք մեզ տելեգրամում
