ՀՀ արտաքին գործերի փոխնախարար Վահան Կոստանյանը ապրիլի 17-19-ը կայացած Անթալիայի դիվանագիտական ֆորումի շրջանակներում հարցազրույց է տվել թուրքական ԶԼՄ-ներին։ Փոխնախարարը նշել է, որ Հայաստանը պատրաստ է հայ-թուրքական սահմանի բացմանը՝ հավելելով, որ նախապատրաստական աշխատանքները ավարտված են, սահմանին անհրաժեշտ ենթակառուցվածքները՝ ստեղծված։
«Հայաստանը պատրաստ է այսօր, նույնիսկ պատրաստ էր երեկ։ Մենք պատրաստ ենք թե՛ քաղաքական, թե՛ տեխնիկական առումով, սահմանին անհրաժեշտ բոլոր աշխատանքներն ավարտված են։ Այս փուլում որոշումը Թուրքիայի կողմում է»,- նշել է Կոստանյանը։
Հարցին՝ արդյոք նախատեսվո՞ւմ է նոր հանդիպում Թուրքիայի նախագահ Ռեջեփ Թայիփ Էրդողանի և ՀՀ վարչապետ Նիկոլ Փաշինյանի միջև, Կոստանյանը պատասխանել է, որ այս պահին նման հանդիպում նախատեսված չէ, սակայն երկու առաջնորդները կապի մեջ են։
Անդրադառնալով Հայաստան-Ադրբեջան հարաբերություններին՝ Կոստանյանը նշել է, որ երկու երկրների միջև հաստատվել է խաղաղություն, և այժմ ուշադրությունը կենտրոնացած է տնտեսական համագործակցության ու առևտրի զարգացման վրա։ Նա հավելել է, որ սահմանազատման նման տեխնիկական գործընթացները ընթանում են բնական հունով։
Խոսելով ԱՄՆ-Իրան հարաբերությունների մասին՝ Կոստանյանը նշել է, որ տարաձայնությունները պետք է լուծվեն դիվանագիտական ճանապարհով։ Նա ընդգծել է տարածաշրջանում հրադադարի կայուն և երկարատև լինելու կարևորությունը՝ նշելով, որ երկարաժամկետ խաղաղության նկատմամբ կա զգուշավոր լավատեսություն։
Հորմուզի նեղուցում տեղի ունեցող զարգացումների վերաբերյալ փոխնախարարն ընդգծել է, որ դրանք ազդեցություն ունեն գլոբալ շուկաների վրա, ինչն էլ անուղղակիորեն ազդում է Հայաստանի տնտեսության վրա։ Նա ընդգծել է, որ մինչ այժմ լուրջ ճգնաժամ չի արձանագրվել, սակայն գործընթացի երկարաձգման դեպքում երկրի տնտեսական աճն ու ընդհանուր պատկերը կարող են տուժել։
Հիշեցնենք, որ Անթալիայի դիվանագիտական ֆորումում այս տարի Հայաստանը ներկայացրել է փոխարտգործնախարար Վահան Կոստանյանը։
Հետևեք մեզ տելեգրամում
