Ռուսաստանում դադարեցվել է Հայաստանից ներմուծված «Ջերմուկ» հանքային ջրի մեծ խմբաքանակի վաճառքը

Ռուսաստանում վաճառքից հանվել է Հայաստանից ներմուծված «Ջերմուկ» հանքային ջրի մեծ խմբաքանակ։ Ըստ ռուսական լրատվամիջոցների վաճառքից հանվել է 338 հազար շիշ հանքային ջուր՝ 2026 թվականի փետրվարի 17-ի և մարտի 5-ի արտադրության ամսաթվերով։ Դրանք չեն վաճառվի մինչև ստուգման ավարտը։

«Честный знак» պետական մակնշման համակարգը ժամանակավորապես դադարեցրել է այդ խմբաքանակի վաճառքը թե՛ առցանց, թե՛ ֆիզիկական խանութներում՝ Ռոսպոտրեբնադզորի դիմումի հիման վրա, որը որպես պատճառ նշել է քաղաքացիների կյանքի և առողջության հնարավոր վնասը բացառելու անհրաժեշտությունը։ Գերատեսչությունում նշել են, որ որոշման հիմքում պարտադիր պահանջների խախտումներն են։

Նշենք, որ «Ջերմուկ Գրուպի»-ից «Ազատությանը» խոստացել են ավելի ուշ մեկնաբանություն տալ խնդրի վերաբերյալ իսկ Հայաստանի սննդի անվտանգության տեսչական մարմնի մամուլի խոսնակ Անուշ Հարությունյանը փոխանցել է, որ ՌԴ պետական համապատասխան մարմիններից «Ջերմուկի» հարցով որևէ պաշտոնական գրություն դեռ չեն ստացել: