ԱՄՆ-ը պատրաստվում է կրճատել այն ռազմական հնարավորությունները, որոնք կարող են տրամադրվել ՆԱՏՕ-ին խոշոր պատերազմի կամ ճգնաժամի դեպքում, հաղորդում է Reuters-ը։ Խոսքը վերաբերում է «NATO Force Model» համակարգին, որի շրջանակում դաշինքի անդամ երկրները նախապես սահմանում են, թե ինչ ուժեր և տեխնիկա կարող են արագ ներգրավվել ՆԱՏՕ-ի պաշտպանության համար ռազմական բախման կամ անդամ երկրներից մեկի վրա հարձակման դեպքում։
«Reuters»-ի տվյալներով՝ Պենտագոնը մտադիր է զգալիորեն նվազեցնել այն ռազմական ռեսուրսների ծավալը, որոնք ԱՄՆ-ը պատրաստ է տրամադրել եվրոպական դաշնակիցներին նման իրավիճակներում։ Աղբյուրների փոխանցմամբ՝ Վաշինգտոնը ծրագրում է այդ որոշման մասին պաշտոնապես հայտարարել ուրբաթ օրը Բրյուսելում կայանալիք ՆԱՏՕ-ի պաշտպանության քաղաքականության ղեկավարների հանդիպմանը։ Նյութում նշվում է, որ ԱՄՆ նախագահ Դոնալդ Թրամփը բազմիցս հայտարարել է՝ եվրոպական երկրները պետք է ավելի մեծ պատասխանատվություն ստանձնեն մայրցամաքի անվտանգության համար և ավելացնեն ռազմական ծախսերը։
«Reuters»-ը նաև գրում է, որ ՆԱՏՕ-ում աճում են մտահոգությունները, թե Վաշինգտոնը կարող է աստիճանաբար նվազեցնել իր դերը եվրոպական անվտանգության համակարգում։ Վերջին շաբաթներին ԱՄՆ վարչակազմը հայտարարել էր նաև Եվրոպայում տեղակայված շուրջ 5000 ամերիկացի զինծառայողի կրճատման ծրագրերի մասին։
Հետևեք մեզ տելեգրամում
