Թուրքիայի նախագահ Ռեջեփ Թայիփ Էրդողանն այսօր հրամանագիր է ստորագրել Թուրքիայի ամենահեղինակավոր համալսարաններից Բիլգի համալսարանի փակման մասին, հայտնել են թուրքական ԶԼՄ-ները։
Հրամանագրում նշվել է, որ համալսարանի լիցենզիան չեղարկվել է «Բարձրագույն կրթության մասին» թիվ 2547 օրենքի հավելյալ 11-րդ հոդվածի համաձայն։ Այդ դրույթը հնարավորություն է տալիս Թուրքիայի բարձրագույն կրթության խորհրդին փակել համալսարանը, եթե կրթության որակը համարվում է անբավարար, և իրավիճակը շտկելու վերաբերյալ տրված առաջարկություններն ու նախազգուշացումները չեն իրականացվում։
Համալսարանը ղեկավարող հիմնադրամը սեպտեմբերից գտնվում էր հոգաբարձուի կառավարման ներքո՝ «Can Holding» ընկերության Խնայողական ավանդների ապահովագրության հիմնադրամի (TMSF) կողմից։
Ավելի վաղ համալսարանը հայտարարել էր, որ փակման դեպքում ուսանողները կրթությունը կշարունակեն Միմար Սինանի անվան գեղարվեստի համալսարանում (MSGSÜ), որը 2021 թվականին նշանակվել էր որպես երաշխավոր պետական համալսարան։
Թուրքական մամուլը որոշումը կապում է «Can Holding» ընկերության նկատմամբ իրականացվող հետաքննության հետ, որը կասկածվում է փողերի լվացման, հարկերից խուսափելու և կազմակերպված հանցավորության հետ կապերի մեջ։
Հետևեք մեզ տելեգրամում
