Հայաստանը առավելագույնը երկու տարուց կունենա Եվրոպական միության հետ վիզաների ազատականացում։ Այս մասին մայիսի 24-ին Շիրակի մարզի Մարալիկ քաղաքում քարոզարշավի ընթացքում հայտարարել է վարչապետ Նիկոլ Փաշինյանը։
Նրա խոսքով՝ 2018-2025 թվականների ընթացքում Հայաստանից դեպի ԵՄ երկրներ մեկնողների թիվը աճել է շուրջ 500 տոկոսով, ինչը, ըստ նրա, ազդեցություն է ունեցել վիզաների ազատականացման գործընթացի վրա։ «Նրանք մեզ ասում են՝ Եվրամիության հետ այդքան լավ հարաբերություններ ունեք, մի հատ վիզայի հարց չե՞ք կարողանում լուծել։ Իսկ գիտե՞ք՝ ինչու է այդպես, որովհետև 2018-2025-ին ՀՀ-ից ԵՄ մեկնողների թիվը 500 տոկոսով աճել է»,- նշել է Փաշինյանը։
Նա վստահեցրել է, որ գործընթացը կարող է ավարտվել առավելագույնը երկու տարվա ընթացքում։ «Այդ ժամանակ ձեզ մնալու է Լառնակա գնալու համար անձնագիր չմոռանալ, տոմսն էլ, դե, գիտեք՝ երկու եվրո է»,- հավելել է վարչապետը։
Հետևեք մեզ տելեգրամում
