ԱՄՆ նախագահ Դոնալդ Թրամփը հեռախոսազրույց է ունեցել Պակիստանի և Մերձավոր Արևելքի մի քանի երկրների և առաջնորդների հետ։ Թրամփը կոչ է արել նրանց միանալ Աբրահամի համաձայնագրերին՝ Իսրայելի հետ հարաբերությունները կարգավորելու համար, եթե Վաշինգտոնն ու Թեհրանը հասնեն խաղաղության համաձայնագրի։ Այդ մասին հաղորդում է «Axios»-ը՝ հղում անելով երկու ամերիկացի պաշտոնյաների։
ԱՄՆ առաջնորդը հույս է հայտնել, որ Իրանի հակամարտության ավարտից հետո այն երկրները, որոնք չեն մասնակցում Աբրահամի համաձայնագրերին կամ չունեն խաղաղության պայմանագիր Իսրայելի հետ, կկարգավորեն իրենց հարաբերությունները Թել Ավիվի հետ։
Նշենք, որ Թրամփը հեռախոսազրույց է ունեցել Բահրեյնի, Եգիպտոսի, Հորդանանի, Կատարի, ԱՄԷ-ի, Պակիստանի, Սաուդյան Արաբիայի և Թուրքիայի առաջնորդների հետ։
Կայքի փոխանցմամբ՝ Կատարի, Պակիստանի և Սաուդյան Արաբիայի ներկայացուցիչները, որոնք դիվանագիտական հարաբերություններ չունեն Իսրայելի հետ, զարմացած են Սպիտակ տան գործող նախագահի խնդրանքից։
Նշենք, որ Աբրահամի համաձայնագրերը կնքվել է Իսրայելի և մի քանի արաբական երկրների միջև ԱՄՆ միջնորդությամբ 2020-2021 թվականներին։ 2020 թվականին Բահրեյնը, Մարոկկոն և ԱՄԷ-ն կարգավորել են հարաբերությունները Իսրայելի հետ։ 2021 թվականին Սուդանը հայտարարել է Իսրայելի հետ դիվանագիտական հարաբերություններ հաստատելու մասին։ Այս համաձայնագրերից առաջ Իսրայելը արաբական պետություններից դիվանագիտական հարաբերություններ ուներ միայն Եգիպտոսի և Հորդանանի հետ։
Հետևեք մեզ տելեգրամում
