«Պատանի երաժիշտների դասական Եվրատեսիլ 2026» մրցույթում հաղթել է Լեհաստանի ներկայացուցիչ Միհալ Ստոչելը, իսկ Հայաստանի մասնակից Էլեն Վիրաբյանը զբաղեցրել է 3-րդ հորիզոնականը։ Armenpress-ի հաղրդմամբ՝ մրցույթը հյուրընկալվել է Երևանում՝ հունիսի 6-ին՝ Արամ Խաչատրյանի ծննդյան օրը, Ալ. Սպենդիարյանի անվան օպերայի և բալետի ազգային ակադեմիական թատրոնում։
Ստոչելը կատարել է Միկոլայ Մայկուսիակի «Դասական կոնցերտ՝ ակորդեոնի համար» ստեղծագործությունը։ Երկրորդ հորիզոնականն է զբաղեցրել Լատվիայի ներկայացուցիչ Սոնյա Միսինյանը։ Նա կատարել է Էմանուել Սեժուռնինի Կոնցերտ մարիմբայի և լարայինների համար գործը։
Հայաստանի ներկայացուցիչը՝ 15-ամյա ֆլեյտահարուհի Էլեն Վիրաբյանը, զբաղեցրել է 3-րդ հորիզոնականը։ Նա կատարել է Արամ Խաչատրյանի Ջութակի կոնցերտը։ «Դասական Եվրատեսիլին» մասնակցել են ջութակահարներ, դաշնակահարներ, կլարնետահար, ակորդեոնահար, ֆլեյտահար և մարիմբահարներ Հայաստանից, Բելգիայից, Կիպրոսից, Չեխիայից, Գերմանիայից, Լատվիայից, Լեհաստանից, Պորտուգալիայից, Սերբիայից, Շվեդիայից և Շվեյցարիայից։
Մասնակից բոլոր երկրների ներկայացուցիչները ելույթ են ունեցել Հայաստանի ազգային ֆիլհարմոնիկ նվագախմբի նվագակցությամբ։ Համերգը ղեկավարել է նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը։ Երեկոն վարել են Հրաչուհի Ութմազյանն ու Համլետ Առաքելյանը։
Հաղթողն ընտրվել է ժյուրիի քվեարկության արդյունքներով։ Միջազգային ժյուրիի կազմում ընդգրկված են եղել գերմանացի դիրիժոր Ջուլիեն Սալեմկուրը, իսպանացի ֆլեյտահար Էդուարդ Վելմարը, Լոնդոնի սիմֆոնիկ նվագախմբի դիրիժոր Ռոման Սիմովիչը և հայ թավջութակահար Նարեկ Հախնազարյանը։
Հետևեք մեզ տելեգրամում
