Երևանում խցանումների խնդիրը լուծելու նպատակով առաջիկայում նախատեսվում է սահմանափակումներ մտցնել մարդատար ավտոմեքենաների համար՝ զուգահեռաբար ընդլայնելով հանրային տրանսպորտի առանձնացված գծերի ցանցը։ Այս մասին Ազգային ժողովի մշտական հանձնաժողովների համատեղ նիստում 2025 թվականի պետական բյուջեի կատարման տարեկան հաշվետվության քննարկման ժամանակ հայտարարել է Երևանի քաղաքապետ Տիգրան Ավինյանը։ Փոխանցում է «Արմենպրես»-ը:
Քաղաքապետը հայտնել է, որ Երևանում նախատեսվում է ներդնել եվրոպական քաղաքներում կիրառվող մոտեցումները։ «Մարդատար ավտոմեքենաների համար վստահորեն պետք է մտցվեն որոշակի սահմանափակումներ, և դրանք փոխարինվեն հանրային տրանսպորտի առանձնացված ուղեգծերով»,- նշել է նա՝ ընդգծելով, որ հանրային տրանսպորտը իր ժամանակացույցով չի կարող աշխատել, եթե չլինեն սահմանափակումներ մարդատար ավտոմեքենաների համար։ Ավինյանի գնահատմամբ՝ նույնիսկ հանրային տրանսպորտի շարունակական զարգացումը բավարար չէ խցանումների խնդիրը լուծելու համար։
Ավինյանը նաև հայտնել է, որ քաղաքապետարանը ստեղծել է Երևանի երթևեկության կառավարման կենտրոն, որի հիմնական նպատակը թվային լուծումների ներդրումն ու երթևեկության հոսքերի վերլուծությունն է։ Քաղաքապետի խոսքով՝ ներկայում իրականացվում է պիլոտային ծրագիր, որի շրջանակում չափվում են մայրաքաղաք մուտք գործող ավտոմեքենաների հոսքերը։
Նախնական արդյունքները սպասվում են 2026 թվականի սեպտեմբեր-հոկտեմբեր ամիսներին, իսկ ծրագրի գործնական իրականացումը նախատեսվում է սկսել 2027 թվականից։
Հետևեք մեզ տելեգրամում
