Թուրքիայի արտաքին գործերի նախարար Հաքան Ֆիդանը հունիսի 17-18-ը կայցելի Մոսկվա, որտեղ նախատեսված են բանակցություններ Ուկրաինայի պատերազմի, Սև ծովում նավագնացության անվտանգության և Հարավային Կովկասում զարգացումների շուրջ։ Այս մասին հայտնում է «Reuters»-ը։
Ֆիդանը հանդիպումներ կունենա ՌԴ արտգործնախարար Սերգեյ Լավրովի, ինչպես նաև նախագահ Վլադիմիր Պուտինի հետ։ Աղբյուրի փոխանցմամբ՝ Թուրքիայի արտգործնախարարը կվերահաստատի Անկարայի պատրաստակամությունը՝ հարթակ տրամադրելու ռուս-ուկրաինական բանակցությունների համար, ինչպես նաև հանդես կգա Սև ծովում լարվածության հետագա սրումը կանխելու կոչով։ Ակնկալվում է, որ թուրքական կողմը վերստին օրակարգ կբերի սևծովյան ավազանի նավահանգիստների և էներգետիկ ենթակառուցվածքների անվտանգության ապահովման հարցը՝ առաջարկելով այդ ուղղությամբ ռազմական գործողությունների սահմանափակում և հրադադարի հաստատում:
«Reuters»-ի փոխանցմամբ՝ քննարկումների ընթացքում կողմերը կանդրադառնան նաև Հարավային Կովկասում տեղի ունեցող զարգացումներին, Հայաստանի և Ադրբեջանի միջև ընթացող խաղաղության գործընթացին, «որը կարող է ազդել տարածաշրջանում Թուրքիայի և Հայաստանի հարաբերությունների կարգավորման դինամիկայի վրա»։
Հետևեք մեզ տելեգրամում
