Ճապոնիայի իշխող կոալիցիայի մաս կազմող «Ճապոնիայի նորացման կուսակցությունը» հանդես է եկել նոր նախաձեռնությամբ՝ առաջարկելով երկրի ռազմածովային ուժերը զինել ատոմային սուզանավերով և վերանայել միջուկային զենքի ներկրման տասնամյակների արգելքը։ Այս մասին հայտնում է «Kyodo» լրատվական գործակալությունը՝ հղում անելով կուսակցության պաշտոնական փաստաթղթին, որն առաջիկայում կփոխանցվի վարչապետ Սանաե Տակաիտիի քննարկմանը, փոխանցում է «ՏԱՍՍ»-ը:
Այս առաջարկները պատրաստվել են Տոկիոյի անվտանգության ոլորտի հիմնարար սկզբունքների վերանայման համատեքստում, որոնց մշակումը նախատեսվում է ավարտին հասցնել մինչև տարեվերջ։ Թեև իշխող կոալիցիայի գլխավոր ուժը՝ Լիբերալ-դեմոկրատական կուսակցությունը (ԼԴԿ), իր պատրաստած պաշտոնական նախագծում դեռևս չի ներառել ատոմային սուզանավերի և միջուկային արգելքի չեղարկման հարցերը, սակայն, ըստ աղբյուրների, ԼԴԿ ներսում ևս քիչ չեն այս ռազմական արդիականացման կողմնակիցները։
Հիշեցնենք, որ Հիրոսիմայի և Նագասակիի ողբերգությունից հետո Ճապոնիայում գործում են այսպես կոչված «երեք ոչ միջուկային սկզբունքները»՝ չունենալ միջուկային զենք, չարտադրել միջուկային զենք, չներկրել միջուկային զենք, սակայն այս սկզբունքներն ունեն իրավական առանձնահատկություն. դրանք հաստատվել են բացառապես կառավարության որոշմամբ, չունեն օրենքի կամ Սահմանադրության ուժ և կարող են համեմատաբար հեշտությամբ վերանայվել գործադիրի կողմից։
«Ճապոնիայի նորացման կուսակցությունը» և իշխող վերնախավի զգալի հատվածն առաջարկում են անձեռնմխելի թողնել առաջին երկու կետերը (չունենալ և չարտադրել), սակայն ամբողջությամբ հրաժարվել երրորդից՝ ներկրման արգելքից։ Ըստ նախաձեռնության հեղինակների՝ ներկրման գործող արգելքը ճգնաժամային կամ պատերազմական իրավիճակներում կարող է լրջորեն խոչընդոտել Ճապոնիայի տարածք կամ տարածքային ջրեր ամերիկյան միջուկային զենքի արագ մուտքին։
Տոկիոյում կողմնակիցները պնդում են, որ այս արգելքի չեղարկումը և ԱՄՆ միջուկային զինանոցի հնարավոր ներկայությունը կղզում էապես կմեծացնի Տոկիո-Վաշինգտոն դաշինքի զսպող ուժը տարածաշրջանում՝ «հաշվի առնելով Չինաստանի և Հյուսիսային Կորեայի կողմից աճող հրթիռամիջուկային սպառնալիքները»։
Ակնկալվում է, որ մինչև տարեվերջ Ճապոնիայի անվտանգության նոր ռազմավարության շուրջ քննարկումները կանցնեն առավել գործնական փուլ, ինչը կարող է շրջադարձային լինել հետպատերազմյան Ճապոնիայի պաշտպանական քաղաքականության համար։
Հետևեք մեզ տելեգրամում
