Իտալիան հրաժարվում է ուկրաինացի մանկատան երեխաներին վերադարձնել հայրենիք

Իտալիայի դատարանները արգելափակում են 2022 թվականին Սումիի մանկատնից տարհանված մի քանի տասնյակ ուկրաինացի երեխաների վերադարձը հայրենիք, հայտնում է «CNN»-ը։

Երեխաները Իտալիա էին տարհանվել ռուս-ուկրաինական պատերազմի սկզբին։ Սակայն տեղական իշխանությունները նրանց ճանաչել են որպես առանց ուղեկցության անչափահաս փախստականներ և, ըստ իտալական օրենքների, նշանակել են նոր խնամակալներ՝ փաստացի փոխելով նրանց իրավական կարգավիճակը։ Կիևը պնդում է, որ տարհանումը ժամանակավոր էր և պահանջում է երեխաների վերադարձը, սակայն իտալական կողմը հղում է անում դատական համակարգի անկախությանը և նշում, որ որոշումները կայացնում են դատարանները։

Ուկրաինայի մարդու իրավունքների պաշտպան Դմիտրի Լուբինեցը «CNN»-ին հայտնել է, որ Իտալիան չի տրամադրում բավարար համագործակցություն և չի թույլատրում երեխաների կացության պայմանների ստուգում։ Նրա խոսքով՝ իրավիճակը դժվարացնում է նրանց վերադարձի գործընթացը։

Իտալիայում մի շարք խնամակալ ընտանիքներ և ակտիվիստներ դեմ են երեխաների վերադարձին՝ նշելով, որ պատերազմը դեռ շարունակվում է։ Միաժամանակ կազմակերպվել է նաև ստորագրահավաք, որը հավաքել է ավելի քան 18 հազար ստորագրություն՝ երեխաներին երկրում թողնելու օգտին։ Ուկրաինական կողմի տվյալներով՝ 2022-ին Եվրոպա է տարհանվել շուրջ 4800 երեխա, որոնցից ավելի քան 300-ի վերադարձը մինչ այժմ արգելափակված է տարբեր եվրոպական երկրներում, այդ թվում՝ Իտալիայում, Գերմանիայում և Ավստրիայում։