Իսրայելի պաշտպանության բանակը հունիսի 19-ի գիշերը լայնածավալ հարվածներ է հասցրել Լիբանանի հարավային և արևելյան շրջաններում գտնվող «Հեզբոլլահ» շարժման ենթակառուցվածքներին։ «Արմենպրես»-ի փոխանցմամբ՝ այդ մասին հայտնել է ԻՊԲ-ն իր պաշտոնական Telegram ալիքում։
Իսրայելական բանակի տվյալներով՝ թիրախավորվել են ավելի քան 80 օբյեկտներ, այդ թվում՝ հարավային Լիբանանի Նաբատիե շրջանում տեղակայված կառույցներ։ Բացի այդ, հարվածներ են հասցվել Լիբանանի արևելքում՝ Բեկաա հովտում գտնվող «Հեզբոլլահ»-ի երկու հրամանատարական կենտրոնների։
Իսրայելի պաշտպանության բանակը հայտարարել է, որ գործողության ընթացքում ոչնչացվել են հրամանատարական կենտրոններում գործող «Հեզբոլլահ»-ի տասնյակ անդամներ։
Իսրայելական կողմի փոխանցմամբ՝ բանակը շարունակում է իր գործողությունները հարավային Լիբանանում՝ կենտրոնանալով հատկապես Բոֆորի շրջանում «Հեզբոլլահ»-ի կողմից տարիների ընթացքում ստեղծված ռազմավարական ստորգետնյա ենթակառուցվածքների ապամոնտաժման վրա։
Միաժամանակ, Լիբանանի առողջապահության նախարարությունը հայտնել է, որ հունիսի 19-ի կեսգիշերից մինչև առավոտ երկրի հարավային տարբեր շրջանների ուղղությամբ իրականացված իսրայելական ինտենսիվ հարվածների հետևանքով զոհվել է առնվազն 18 մարդ, իսկ 33-ը ստացել են տարբեր աստիճանի վնասվածքներ։
Լիբանանյան կողմը դեռևս չի հրապարակել զոհվածների ինքնության վերաբերյալ մանրամասներ, իսկ իրավիճակը տարածաշրջանում շարունակում է մնալ լարված։
Հետևեք մեզ տելեգրամում
