Ռուսական ուժերը անօդաչու թռչող սարքով հարվածել են թուրքական բեռնատար նավի, ինչի հետևանքով նավում խոշոր հրդեհ է բռնկվել: Այս մասին հայտարարել է Ուկրաինայի ռազմածովային ուժերի մամուլի ծառայությունը։
Ըստ հաղորդագրության՝ ռուսական ԱԹՍ-ի թիրախում է հայտնվել Պանամայի դրոշի ներքո նավարկող, սակայն թուրքական ընկերության պատկանող «VICTRESS» բեռնատար նավը։ Դեպքի պահին նավի վրա եղել է անձնակազմի 9 անդամ, որոնք Եգիպտոսի, Թուրքիայի և Հնդկաստանի քաղաքացիներ են։
«Հաշվի առնելով ստեղծված բարդ իրավիճակը և հրդեհի հետագա տարածման վտանգը՝ Ուկրաինայի ՌԾՈւ կատերների անձնակազմերը հաջողությամբ իրականացրել են փրկարարական գործողություն՝ տարհանելով բեռնատար նավի անձնակազմին։ Ցավոք, նավաստիների շրջանում կան զոհեր և վիրավորներ»,- նշված է Ուկրաինայի ռազմածովային ուժերի հայտարարության մեջ։
Ըստ Ուկրաինայի վերականգնման, տարածաշրջանային և ենթակառուցվածքների զարգացման հարցերով փոխվարչապետ Ալեքսեյ Կուլեբայի՝ զոհվել է Եգիպտոսի 58-ամյա քաղաքացի: Մոսկվան դեռ չի մեկնաբանել միջադեպը:
Հետևեք մեզ տելեգրամում
