Թուրքիայի «Մերձավոր Արևելքի համերաշխության ցանց» նախաձեռնությունը կազմակերպել է մամուլի ասուլիս և հանրային քննարկում՝ «Թող մեր հարևան Հայաստանի հետ սահմանները բացվեն, հարաբերությունները կարգավորվեն» խորագրով։
Քննարկման ընթացքում մասնակիցները հանդես են եկել Թուրքիայի և Հայաստանի միջև հարաբերությունների կարգավորման, սահմանների վերաբացման և տարածաշրջանային համագործակցության խորացման օգտին։ Նրանք նշել են, որ հայ-թուրքական սահմանի բացումը կարող է նպաստել տնտեսական, մշակութային և հասարակական կապերի զարգացմանը, ինչպես նաև տարածաշրջանային կայունության ամրապնդմանը։
Ելույթ ունեցողների թվում էին դոկտոր Յըլդըզ Օնենը, պրոֆեսոր Զեքի Քըլըչարսլանը, «ÖNCEDER» ՀԿ ներկայացուցիչ Դավութ Գյուլերը, «Սոցիալական արդարության շարժման» ներկայացուցիչ Ջեմալ Բիլգինը և Ջեյդա Սենա Օզմենը։
Նրանք ընդգծել են, որ Հայաստանի և Թուրքիայի միջև հարաբերությունների կարգավորումը կարող է դրական ազդեցություն ունենալ նաև տարածաշրջանային խաղաղության գործընթացների վրա։ Մասնակիցները նաև կարծիք են հայտնել, որ Ղարաբաղյան հակամարտության ավարտից հետո սահմանների փակ մնալը կորցրել է իր նախկին հիմնավորումները։
Հետևեք մեզ տելեգրամում
