Բրյուսելում անցկացված «Կապակցվածության օրակարգի հարթակի» բարձր մակարդակի մեկնարկային միջոցառման շրջանակում Եվրոպական հանձնաժողովը, Եվրոպական ներդրումային բանկը (EIB) և ՀՀ տարածքային կառավարման և ենթակառուցվածքների նախարարությունը ստորագրել են համատեղ մտադրությունների հուշագիր, որով պաշտոնապես մեկնարկել է Հայաստանի ճանապարհային ենթակառուցվածքների զարգացմանն ուղղված նոր խորհրդատվական աջակցությունը: Այս մասին հայտնել է ՀՀ տարածքային կառավարման և ենթակառուցվածքների նախարարությունը։
Ծրագրով նախատեսվում է աջակցություն տրամադրել Ախուրիկ-Կայան և Մարգարա-Կայան ռազմավարական ճանապարհային ուղղությունների նախապատրաստական աշխատանքներին։ Նախագծերի նպատակն է սահմանային անցակետերը կապել Հայաստանի ճանապարհային ցանցին և բարելավել տարածաշրջանային տրանսպորտային կապերը։
Առաջին փուլում Եվրոպական ներդրումային բանկը կտրամադրի խորհրդատվական աջակցություն՝ անհրաժեշտ ուսումնասիրությունների շրջանակը սահմանելու և ճանապարհային նախագծերի իրագործելի տարբերակները մշակելու նպատակով։
ՏԿԵՆ-ի տվյալներով՝ նախագծերն իրականացվում են Հայաստանի կառավարության «Խաղաղության խաչմերուկ» նախաձեռնության շրջանակում և ուղղված են Հայաստանի՝ որպես տարածաշրջանային տրանսպորտային և լոգիստիկ հանգույցի դերակատարության ամրապնդմանը, ինչպես նաև Եվրոպական միության Կապակցվածության օրակարգի առաջմղմանը։
Հուշագիրը ստորագրել են Եվրոպական հանձնաժողովի ներկայացուցիչ Ադրիենն Կիրալին, ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը, ինչպես նաև Վերակառուցման և զարգացման բանկի և Եվրոպական ներդրումային բանկի ներկայացուցիչները։
Նախաձեռնությունը դիտարկվում է որպես Հայաստանի և Եվրոպական միության միջև ենթակառուցվածքային համագործակցության խորացման հերթական քայլ՝ ուղղված տարածաշրջանային կապուղիների զարգացմանն ու տնտեսական ինտեգրման խթանմանը։
Հետևեք մեզ տելեգրամում
