Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն Բրյուսելում լրագրողների հետ զրույցում հայտնել է, որ քննարկվում են Թուրքիայի և Հայաստանի միջև նախկինում գործող երկաթուղային և ավտոճանապարհային անցումների վերականգնման հնարավորությունները։
Նրա խոսքով՝ երկու կողմերն էլ ակտիվորեն աշխատում են ենթակառուցվածքների վերականգնման ուղղությամբ՝ ներառյալ վերանորոգման աշխատանքները և անհրաժեշտ նախապատրաստական գործընթացները։ «Մենք նախկինում ակտիվ երկաթուղային և ցամաքային կապ ենք ունեցել։ Մենք օր օրի մեծացնում ենք մեր համագործակցությունը՝ դրանք հնարավորինս շուտ կյանքի կոչելու համար», – ասել է նա։
Իսկ «X»-ում կատարած գրառման մեջ Ուրալօղլուն նշել է, որ հայկական կողմը արդեն իրականացնում է որոշ նախապատրաստական աշխատանքներ, իսկ նախագծերի համար նախատեսված մրցույթները գտնվում են ընթացքի փուլում։
«Քննարկել ենք նաև Կարս-Անի հատվածում՝ Մետաքսի ճանապարհի վրա գտնվող պատմական Անիի կամուրջի վերականգնման գործընթացը՝ անդրադառնալով այն քայլերին, որոնք կօգնեն վերականգնել մեր ընդհանուր պատմության կարևոր հետքերից մեկը», -գրել է Ուրալօղլուն։
Հետևեք մեզ տելեգրամում
