ՀՀ ֆինանսների նախարար Վահե Հովհաննիսյանը մասնակցել է «ՕՊԵԿ հիմնադրամի զարգացման ֆորում 2026» խորագրով բարձր մակարդակի միջոցառմանը, որի շրջանակում ստորագրվել է Հայաստանի Հանրապետության և ՕՊԵԿ-ի Միջազգային զարգացման հիմնադրամի միջև «Հայաստանի տնտեսական վերափոխման ծրագիր» բյուջետային աջակցության վարկային համաձայնագիրը, հայտնում են ՀՀ ֆինանսների նախարարությունից։
Համաձայնագրի արժեքը կազմում է 80 միլիոն եվրո։ Այն նպատակ ունի աջակցել Հայաստանի տնտեսական վերափոխմանը՝ բարելավելով գործարար և ներդրումային միջավայրը, խթանելով ներդրումներն ու առևտուրը, ինչպես նաև նպաստելով ավելի կանաչ, ներառական և դիմակայուն տնտեսության ձևավորմանը։
Ֆորումը նվիրված էր ՕՊԵԿ-ի Միջազգային զարգացման հիմնադրամի գործունեության 50-ամյակին, որին մասնակցել են տարբեր երկրների ղեկավարներ, պետական պաշտոնյաներ, միջազգային ֆինանսական կազմակերպությունների ներկայացուցիչներ և զարգացման ոլորտի փորձագետներ։
Ֆորումի ընթացքում Վահե Հովհաննիսյանը հանդիպումներ է ունեցել ՕՊԵԿ-ի Միջազգային զարգացման հիմնադրամի նախագահ Աբդուլհամիդ Ալխալիֆայի, ինչպես նաև հիմնադրամի ղեկավար կազմի այլ ներկայացուցիչների հետ։ Քննարկումների ընթացքում անդրադարձ է կատարվել Հայաստանի զարգացման առաջնահերթություններին, միջազգային գործընկերների հետ համագործակցության ընդլայնմանը և նոր ֆինանսական ռեսուրսների ներգրավման հնարավորություններին։
Նախարարության գնահատմամբ՝ նոր վարկային ծրագիրը կնպաստի երկարաժամկետ և կայուն տնտեսական աճի ապահովմանը՝ ստեղծելով լրացուցիչ հնարավորություններ Հայաստանի տնտեսության մրցունակության բարձրացման համար։
Հետևեք մեզ տելեգրամում
