Թուրքիայի Անթապի (Գազիանթեփ) պատմական Բեյ թաղամասում, որը ժամանակին եղել է հայաբնակ կենտրոն, «վերականգնման» անվան տակ իրականացվող նախագծերի արդյունքում պատմական հայկական առանձնատները զանգվածաբար վերածվում են առևտրային հաստատությունների։ Այս մասին հայտնում է «Mezopotamya» լրատվական գործակալությունը։
«Հայ քարագործ վարպետների ձեռքով կերտված և տարածաշրջանի հասարակական կյանքի հիշողությունը կրող այս բարձրապատ առանձնատները, որպես պատմական արժեք պահպանվելու փոխարեն, արագ տեմպերով վերածվում են սրճարանների, ռեստորանների, բուտիկ-հյուրանոցների և ժամանցի վայրերի: Թեև իրականացվող աշխատանքները պաշտոնապես ներկայացվում են որպես պատմական միջավայրի պահպանում, գործնականում դրանք հանգեցնում են թաղամասի ապաբնակեցմանն ու բիզնես գոտու վերածվելուն»,-գրում է լրատվամիջոցը։
Հոդվածում ընդգծվում է նաև, որ Բեյ թաղամասի պատմական կառույցների առևտրայնացումը կարող է վտանգել Գազիանթեփի բազմամշակութային անցյալի պահպանությունը։ Հրապարակման մեջ կոչ է արվում մշակութային ժառանգության պահպանման քաղաքականությունը զերծ պահել բացառապես տնտեսական շահերից և առավել մեծ ուշադրություն դարձնել պատմական հիշողության ու քաղաքային ինքնության պահպանմանը:
Հետևեք մեզ տելեգրամում
