Վրաստանի ընդդիմադիր «Լելո» կուսակցության առաջնորդներից Իրակլի Կուպրաձեն հայտարարել է, թե Անակլիայի խորջրյա նավահանգիստը պետք է կառուցվի Վրաստանի, Ադրբեջանի և Հայաստանի համատեղ մասնակցությամբ և դառնա ամբողջ աշխարհի համար Կովկաս տանող դարպասը։ Այս մասին հայտնում է Վրաստանի Առաջին ալիքը:
«Անակլիան պետք է դառնա երեք երկրների միջև գործընկերության, համակովկասյան խաղաղության, կայունության և բարգավաճման վայր»,- հայտարարել է Կուպրաձեն։ Ըստ ընդդիմադիր գործչի՝ տարածաշրջանային համագործակցությունը, առևտուրը և ենթակառուցվածքային կապերը կարող են նպաստել խաղաղության և կայունության ամրապնդմանը։
Միաժամանակ Վրաստանի էկոնոմիկայի և կայուն զարգացման նախարար Մարիամ Քվրիվիշվիլին հայտարարել է, որ կառավարությունը որոշել է Անակլիայի նավահանգիստը կառուցել «Լենդլորդ» մոդելով։ Նրա խոսքով՝ պետությունը կմնա հիմնական ծովային և նավահանգստային ենթակառուցվածքների սեփականատերը, իսկ միջազգային ընկերությունները կներգրավվեն տերմինալների կառավարման գործընթացում։
Հետևեք մեզ տելեգրամում
