Թուրքմենստանում Հայաստանի դեսպան Արսեն Ավագյանը «Turkmenportal» լրատվական կայքին տված հարցազրույցում հայտնել է, որ Հայաստանը ձգտում է ընդլայնել էներգետիկ համագործակցությունը Թուրքմենստանի հետ, այդ թվում՝ գազի ոլորտում։
Ավագյանի խոսքով՝ Երևանը վարում է էներգամատակարարման աղբյուրների դիվերսիֆիկացման քաղաքականություն և Թուրքմենստանը՝ իր բնական գազի մեծ պաշարներով, դիտարկում է որպես էներգետիկ անվտանգության ապահովման կարևոր գործընկեր։
Ավագյանը նշել է, որ էներգետիկ հարցերը պարբերաբար քննարկվում են միջկառավարական հանձնաժողովի շրջանակներում և համապատասխան նախարարությունների միջև շփումների միջոցով։ Հիշեցնելով, որ Թուրքմենստանը 1990-ականներին Հայաստանի բնական գազի հիմնական մատակարարներից մեկն էր, Ավագյանը նշել է, որ այդ ժամանակ ձեռք բերված փորձը հիմք է հանդիսանում համագործակցության հետագա զարգացման համար։
Դեսպանը նաև ընդգծել է, որ երկու երկրների միջև համագործակցությունը չի սահմանափակվում միայն բնական գազի մատակարարմամբ, այլ կարող է ներառել նաև փորձի փոխանակում, ժամանակակից էներգետիկ տեխնոլոգիաների շահագործում և համատեղ նախագծերի իրականացում։
Հետևեք մեզ տելեգրամում
