ԱՄՆ կառավարությունը հավանություն է տվել Գերմանիային մեծ հեռահարության «Tomahawk» թևավոր հրթիռների վաճառքին: Այս մասին Բունդեսթագում հայտարարել է Գերմանիայի կանցլեր Ֆրիդրիխ Մերցը: Փոխանցում է Die Welt-ը:
«Սրանով մենք փակում ենք մեր պաշտպանության մեջ առկա կարևոր ռազմավարական բացը»,- ընդգծել է Մերցը:
Կանցլերը հրթիռների ձեռքբերման կոնկրետ ժամկետներ չի նշել, սակայն հավելել է, որ Գերմանիան միևնույն ժամանակ շարունակելու է աշխատել «սեփական եվրոպական համակարգերի մշակման» ուղղությամբ, որոնք հետագայում կարող են տեղակայվել Եվրոպայում:
Հիշեցնենք, որ ԱՄՆ նախագահ Դոնալդ Թրամփի վարչակազմը մայիսի սկզբին հայտարարել էր Եվրոպայում ամերիկյան զորքերի ներկայության կրճատման մասին: Այդ ժամանակ Վաշինգտոնը կասեցրել էր նաև «Tomahawk» հրթիռներով զինված հրետանային գումարտակի տեղակայումը Գերմանիայում, որը խոստացվել էր դեռևս նախկին նախագահ Ջո Բայդենի օրոք:
Անդրադառնալով Թրամփի այդ որոշմանը՝ Ֆրիդրիխ Մերցը նշել էր, որ Միացյալ Նահանգներն ինքը բավարար քանակությամբ «Tomahawk» հրթիռներ չունի՝ հաշվի առնելով Իրանի դեմ պատերազմը: Այնուամենայնիվ, կանցլերն ընդգծել էր, որ հրթիռների տեղակայման հնարավորությունը դեռ կորսված չէ: Որպես այլընտրանք քննարկվում էր նաև գերմանական և ամերիկյան ընկերությունների համատեղ ձեռնարկության միջոցով «Tomahawk»-ների արտադրություն հենց Գերմանիայում:
Հետևեք մեզ տելեգրամում
