Կրեմլի խոսնակ Դմիտրի Պեսկովը հայտարարել է, որ Ռուսաստանը շարունակում է կապ պահպանել Թուրքիայի հետ ավելի վաղ Անկարային մատակարարված C-400 զենիթահրթիռային համալիրների հարցի շուրջ՝ ընդգծելով, որ թեման «չափազանց զգայուն» է: Այս մասին հայտնում է «Ինտերֆաքս»-ը։
Պեսկովը մեկնաբանել է թուրքական լրատվամիջոցների հրապարակումները, ըստ որոնց՝ Անկարան իբր վերավաճառել է ռուսական C-400 համակարգերը՝ ԱՄՆ-ի պատժամիջոցներից ազատվելու նպատակով։
«Մենք այս թեմայով շփումներ ենք ունեցել թուրքական կողմի հետ և շարունակելու ենք այդ շփումները»,- ասել է Կրեմլի ներկայացուցիչը։
Լրագրողների հարցին, թե արդյոք Թուրքիան դիմե՞լ է Ռուսաստանին նման վաճառքի թույլտվություն ստանալու համար, և ինչպիսի՞ն է եղել Մոսկվայի արձագանքը, Պեսկովը հրաժարվել է մանրամասներ հայտնել։
«Այս թեման դասվում է չափազանց զգայուն հարցերի շարքին»,- նշել է նա։
Հիշեցնենք, որ ավելի վաղ թուրքական մամուլը հայտնել էր, որ ժամանակին Թուրքիայի՝ Ռուսաստանից գնած С-400-ները վաճառվել են Պարսից ծոցի երկրներից մեկին։
Հետևեք մեզ տելեգրամում
